वीरगञ्ज । पर्सा प्रहरीले श्रोत नखुलेको १० लाख रुपैयाँ हुण्डीको रकमसहित एक भारतीय नागरिकलाई पक्राउ गरेको छ। पक्राउ पर्नेमा भारत, बिहार जिल्ला मोतीहारी थाना रक्सौल वडा नं. १ बस्ने वर्ष ५३ का सुरेन्द्र साह रहेका छन्।
साहलाई जिल्ला प्रहरी कार्यालय पर्सा मातहत खटिएको चेकिङ टोलीले शुक्रबार बिहान करिब ९ बजे वीरगञ्ज महानगरपालिका वडा नं. १६ स्थित रजतजयन्ती चोकबाट पक्राउ गरेको हो ।
उक्त सडक खण्डमा सवारी साधन चेकजाँचका क्रममा मधेश प्रदेश ०३ ०२५ प ९८०७ नम्बरको मोटरसाइकलमा सवार सुरेन्द्र साहको साथबाट उक्त रकम बरामद भएको जिल्ला प्रहरी कार्यालय पर्साका पसूचना अधिकारी प्रहरी नायव उपरीक्षक राजु कार्कीले जानकारी दिए ।
साहले चलाएको मोटरसाइकलको बायाँतर्फको एयर फिल्टरभित्र लुकाइछिपाइ राखिएको अवस्थामा प्रहरीले सो रकम फेला पारेको प्रहरी नयाव उपरीक्षक कार्कीले बताए ।
साहको साथबाट नेपाली १००० दरका नोट ७०० थान, जम्मा ७ लाख । ५०० दरका नोट ६०० थान, जम्मा रू. ३ लाख गरी कूल १० लाख नेपाली रुपैयाँ बरामद गरिएको प्रहरीले जनाएको छ।
प्रहरीले श्रोत नखुलेको उक्त रकम, मोटरसाइकल र पक्राउ परेका सुरेन्द्र साहलाई नियन्त्रणमा लिई थप अनुसन्धान कार्य अगाडि बढाएको जनाकाएको छ।
