वीरगञ्ज। पर्साको बहुदरमाई नगरपालिकामा निःशुल्क आँखा शिविर सम्पन्न भएको छ । पर्सागढी शहीद स्मृति प्रतिष्ठान र वीरगञ्ज सामुदायिक आँखा उपचार केन्द्रको संयुक्त आयोजनामा बहुदरमाई नगरपालिका–४, डोकैला बहुअरीस्थित श्री नेपाल राष्ट्रिय माध्यमिक विद्यालयमा शुक्रबार भएको एक दिने निःशुल्क आँखा शिविरमा ग्रामीण भेगका १३९ जना स्थानीय बासिन्दाको आँखा परीक्षण गरिएको छ । शिविरमा परीक्षण गरिएका सेवाग्राहीमध्ये ३९ जनामा मोतिबिन्दुको लक्षण फेला परेको छ।
मोतिबिन्दु पहिचान भएका सबै बिरामीको वीरगञ्ज सामुदायिक आँखा केन्द्रमै निःशुल्क शल्यक्रिया गरिने जानकारी मेडिकल संयोजक महेशसिंह धामीले दिए । निःशुल्क शल्यक्रिया सेवाले आर्थिक अभावका कारण उपचार गराउन नसकेका स्थानीयलाई ठूलो राहत पुग्ने विश्वास गरिएको छ ।
पर्सागढी शहीद स्मृति प्रतिष्ठानका संस्थापक अध्यक्ष बालकृष्ण श्रेष्ठको अध्यक्षतामा भएको कार्यक्रममा बहुदरमाई नगरपालिकाका प्रमुख सिंगासन सा को प्रमुख अतिथ्यता रहेको थियो । नगर प्रमुख सिंगासन साले नगरवासीको स्वास्थ्यमा गम्भीर रहेको बताउदै विभिन्न संघ संस्थाहरुले निःशुल्क शिविर सञ्चालन गरेर शल्यकक्रिया पनि निःशुल्क गरिदिने गरेकोमा ती संस्थाहरुलाई धन्यवाद दिए ।
पर्सागढी सहिद स्मृति प्रतिष्ठानका अध्यक्ष बालकृष्ण श्रेष्ठले ग्रामीण बस्तीहरूमा आँखा उपचारको पहुँच सीमित रहेकाले स्थानीयले लामो समयदेखि कठिनाइ भोग्दै आएको बताए। उनले यस्ता शिविरहरूले समुदायलाई प्रत्यक्ष राहत पुर्याएको भन्दै प्रतिष्ठानले ग्रामीण क्षेत्रसम्म स्वास्थ्य सेवा पहुँच पुर्याउने सामाजिक अभियानलाई निरन्तरता दिने प्रतिबद्धता व्यक्त गरे।
प्रतिष्ठानका सल्लाहकार सुनिल कुमार रौनियार र अमिताभ बच्चन दासले पनि स्थानीय तहमा गुणस्तरीय स्वास्थ्य सेवा विस्तारका लागि निःशुल्क शिविरहरू प्रभावकारी हुनेमा जोड दिए। शिविरमा महेशसिंह धामी, गीता धामी, अर्जिता ठाकुरसहितको प्राविधिक टोलीले आँखा परीक्षण तथा परामर्श सेवा दिएका थिए ।
