काठमाडौँ। गत भदौ २३ र २४ गतेको जेनजी आन्दोलनका क्रममा भएको आगजनी र तोडफोडको अभियोगमा हालसम्म २६७ जनालाई पक्राउ परेका छन्। जिल्ला प्रहरी परिसर काठमाडौँका अनुसार तोडफोड र आगजनीसम्बन्धी १५४ वटा मुद्दा दर्ता भएका छन्।
पक्राउ परेकामध्ये ८७ जनालाई प्रहरीले हाजिर जमानीमा छाडेको छ। ११३ जनामाथि अनुसन्धान भइरहेको छ, जसमध्ये ३३ जनालाई धरौटीमा रिहा गरिएको छ भने ४३ जनालाई पुर्पक्षका लागि थुनामा पठाइएको छ।
आगजनी, तोडफोड तथा आपराधिक उपद्रवसँग सम्बन्धित कुल १०४ वटा जाहेरी दर्ता भएका छन्। सरकारी कार्यालय आगजनी र तोडफोड ६६ वटा, सर्वोच्च अदालत र अख्तियार दुरुपयोग अनुसन्धान आयोगमा भएका आगजनी र तोडफोडसम्बन्धी जाहेरी प्राप्त संस्थागत एवं व्यापारिक प्रतिष्ठानमा १६ वटा, व्यक्तिगत २२ वटा जाहेरी दर्खास्त सङ्ख्या ४२ रहेका छन्।
त्यस्तै पहिचान नखुलेका ७ जनाको डीएनए परीक्षण प्रक्रिया अघि बढाइएको जिल्ला प्रहरी परिसर काठमाडौंले जनाएको छ। आन्दोलनका क्रममा भएको भवन संरचनाको क्षति सम्बन्धमा २२८ वटा मुचुल्का सम्पन्न गरिएको प्रहरीले जनाएको छ।
आन्दोलनका क्रममा विभिन्न कारागारबाट भागेका १०२ कैदीबन्दीलाई पक्राउ गरी पुनः कारागारमा दाखिला गरिएको छ। हालसम्म ८३ नाल हतियार बरामद तथा दाखिला गरिएको छ।
यस आन्दोलनमा संलग्न भई तोडफोड र आगजनीजस्ता आपराधिक कार्यमा लागेका व्यक्तिहरूमाथि अनुसन्धान जारी रहेको र दोषीहरूलाई कानूनी दायरामा ल्याउने कार्य भइरहेको प्रहरी परिसरले जनाएको छ।
