बारा । जिल्ला प्रहरी कार्यालय बाराले चारवटा मोटरसाईकल बरामद गरेको छ । बाराको पचरौता न.पा. वडा नं. ६, चिकनी टोल नजिकै नेपाल–भारत सीमा क्षेत्रमा गस्तीमा रहेको प्रहरी टोली र तस्करहरूको समूहबीच झडप भएको थियो।
भारतको हनुमाननगरतर्फबाट नेपालतर्फ तस्करीका सामानहरू लोड गरिएको ट्याक्टर र मोटरसाइकलसहित करिब २५ जनाको समूह आइरहेको अवस्थामा इलाका प्रहरी कार्यालय सिम्रौनगढबाट खटिएको गस्ती टोलीसँग जम्काभेट भएको थियो।
प्रहरीले तस्करहरूलाई नियन्त्रणमा लिन खोज्दा उनीहरूले एक्कासी कटुवा बन्दुकबाट २ राउण्ड गोली प्रहार गरेको जिल्ला प्रहरी कार्यालय बाराले जनाएको छ। प्रहरी गस्ती टोलीले जवाफी कारबाहीमा ९ एमएम पेस्तोलबाट ७ राउण्ड जवाफी फायर गरेको थियो।
गोली हानाहानपछि तस्करहरूको समूह ट्याक्टरसहित भारततर्फ भाग्न सफल भए पनि उनीहरूले घटनास्थल वरपर दशगजा क्षेत्रमा चार वटा मोटरसाइकल र केही अन्य सामानहरू छोडेर गएका थिए।
घटनास्थलबाट बरामद भएका सामानहरूमा चार थान भारतीय नम्बर प्लेटका मोटरसाइकल, दुई थान भारतीय सिम प्रयोग भएका स्क्रिन टच मोबाइल, र भारतीय नागरिक रंजित कुमारको नाममा रहेको सवारी चालक अनुमति पत्र (लाइसेन्स) बरामद गरेको जिल्ला प्रहरी कार्यालय बाराले जनाएको छ ।
इलाका प्रहरी कार्यालय सिम्रौनगढका प्रहरी निरीक्षक कृष्णदेव प्रसाद साहको कमाण्डमा थप टोली खटाएर बरामद गरिएका यी सामानहरूलाई नियन्त्रणमा लिई घटनाको थप अनुसन्धान भइरहेको प्रहरकिो भनाई छ।
