काठमाडौं । नेपालका वरिष्ठ मिडिया अधिकारकर्मी तथा सञ्चारविद् लक्ष्मणदत्त पन्त ग्लोबल फोरम फर मिडिया डेभलपमेन्टको उपाध्यक्ष पदमा निर्वाचित भएका छन्।
यो निर्वाचनले पन्तलाई विश्वकै सबैभन्दा ठूलो मिडिया विकास संस्थाहरूको सञ्जालको नेतृत्वमा प्रवेश गर्ने पहिलो नेपाली बनाएको छ। उनलाई आगामी चार वर्षको कार्यकालका लागि निर्वाचित गरिएको हो।
गत मंसिर ४ गते (नोभेम्बर २०) मा मलेसियाको क्वालालम्पुरमा ग्लोबल इन्भेस्टिगेटिभ जर्नालिज्म कन्फरेन्सको समयमा बसेको स्टीयरिङ कमिटीको पहिलो बैठकले उनलाई निर्वाचित गरेको थियो।
उपाध्यक्षको रूपमा पन्तले नव–निर्वाचित अध्यक्ष रावान दामेन, कोषाध्यक्ष क्यारोलिन व्युलेमिन तथा स्टीयरिङ कमिटीका अन्य सदस्यहरूसँग मिलेर काम गर्ने छन् ।
उनीहरूको संयुक्त प्रयास मिडिया विकास, प्रेस स्वतन्त्रता, पत्रकार सुरक्षा, र सूचना विश्वसनीयतामाथि बढ्दै गइरहेका जोखिमबीच विश्व मिडिया समुदायलाई सुदृढ गर्नमा केन्द्रित रहने विश्वास गरिएको छ। उपाध्यक्षमा निर्वाचित भएपछि पन्तले स्टीयरिङ कमिटीको पहिलो औपचारिक बैठकको अध्यक्षता समेत गरेका थिए ।
सो अवसरमा उनले ‘स्थानीयदेखि विश्वव्यापी सहभागितालाई प्रतिबिम्बित गर्ने संस्था र विज्ञसँग मिलेर चुनौतीपूर्ण अवस्थामा समेत मिडिया समुदाय सुदृढ बनाउन काम गर्नेु प्रतिबद्धता व्यक्त गरे ।
वैश्विक स्तरमा परिचित पन्तसँग पत्रकारिता, प्रेस स्वतन्त्रता प्रवर्द्धन, अनुसन्धान, नीतिगत संलग्नता, र परियोजना व्यवस्थापनमा दुई दशकभन्दा बढीको अनुभव छ।
पत्रकारिता विषयमा अन्तराष्ट्रिय स्तरमा भिजिटिङ प्रोफेसरको रुपमा पनि काम गरेका उनले सन् २०१५ मा स्वतन्त्र र उत्तरदायी पत्रकारिता प्रवर्द्धनका लागि मिडिया एक्सन नेपालको स्थापना गरेका थिए ।
जुन अहिले प्रमुख अन्तर्राष्ट्रिय सञ्जालहरूको सक्रिय सदस्य हो। साथै, उनले २०२२ देखि २०२४ सम्म कन्सल्टेटिभ नेटवर्कको निर्वाचित सह–अध्यक्षको रुपमा ५१ मुलुक र १५० भन्दा बढी नागरिक समाज संस्थाहरूबीच साझेदारी मजबुत बनाउन महत्त्वपूर्ण भूमिका खेलेका थिए।
