काठमाडौँ । दोस्रो संस्करणको नेपाल प्रिमियर लिग (एनपिएल) क्रिकेटअन्तर्गत आज दुई महत्वपूर्ण खेलहरू हुँदैछन्। आज हुने खेलहरूमा अपराजित टोलीहरू आफ्नो विजयी यात्रा कायम राख्ने दाउमा छन् भने पराजित टोलीहरू पुनरागमन गर्ने लक्ष्यमा मैदानमा उत्रिनेछन्।
दिनको पहिलो खेल बिहान पौने १२ बजे साविक विजेता जनकपुर बोल्ट्स र विराटनगर किङ्सबीच हुनेछ। सन्दीप लामिछानेको कप्तानीमा रहेको विराटनगर किङ्स लगातार तेस्रो जित दर्ता गर्ने लक्ष्यमा छ। विराटनगरले यसअघि पोखरा एभेन्जर्स र काठमाडौंँ गोर्खाजलाई पराजित गरिसकेको छ।
अनिल साहको नेतृत्वमा रहेको जनकपुर बोल्ट्सले भने पहिलो खेलमै काठमाडौंं गोर्खाजसँग ५ विकेटले पराजित भएपछि लय समात्न चुनौती छ। जनकपुरलाई उपाधि दावेदारी प्रस्तुत गर्न आजको खेल जित्नै पर्ने दबाब छ।
गत संस्करणको उद्घाटन खेलमा जनकपुरले विराटनगरलाई ८ विकेटको सहज जित निकालेको थियो, जसको बदला दिने सोच विराटनगरको रहेको छ।
त्यस्तै दोस्रो खेल अपरान्ह ४ बजे साविक उपविजेता सुदूरपश्चिम रोयल्स र कर्णाली याक्सबीच प्रतिस्पर्धा हुनेछ।
दिपेन्द्र सिंह ऐरीको कप्तानीमा रहेको सुदूरपश्चिम रोयल्स यस संस्करणमा अपराजित यात्रालाई निरन्तरता दिँदै गत संस्करणको फाइनलमा स्तब्ध बनेको पीडा बिर्साउने दाउमा छ।
सोमपाल कामी नेतृत्वको कर्णाली याक्सले पहिलो खेलमा चितवन राइनोजसँग पराजित भए पनि शनिबार लुम्बिनी लायन्सलाई ९ विकेटको रवाफिलो जित निकाल्दै उत्कृष्ट पुनरागमन गरिसकेको छ।
उक्त जितमा कर्णालीका मार्क वाटले विष्फोटक शतकीय पारी खेलेका थिए। गत संस्करणमा सुदूरपश्चिमले कर्णालीलाई ६ विकेटले पराजित गरेको थियो र कर्णाली उक्त हार दोहोर्याउन चाहँदैन।
गत संस्करणमा रनरेटमाथि पर्दै प्लेअफ पुगेको कर्णाली यस पटक सहज यात्राको खोजीमा छ। नेपाल क्रिकेट सङ्घ (क्यान) को आयोजनामा मङ्सिर १ गतेदेखि सुरु भएको यो प्रतियोगिता मङ्सिर २७ मा समापन हुनेछ।
