काठमाडौँ। सरकार र दुर्गा प्रसाईँ नेतृत्वको राष्ट्र, राष्ट्रियता, धर्म, संस्कृति र नागरिक बचाउ महाअभियानबीच आइतबारदेखि घोषणा गरिएको नेपाल बन्द र अनिश्चितकालीन आमहड्तालका सबै कार्यक्रमहरू फिर्ता लिने सहमति भएको छ।
प्रधानमन्त्री निवास बालुवाटारमा शनिबार राति भएको वार्तामा दुई पक्षबीच सो सहमति जुटेको हो। वार्तामा महाअभियानले उठाएका २७ बुँदे मागका सन्दर्भमा विस्तृत छलफल भएको थियो।
महाअभियानका पूर्वघोषित बन्द र हड्तालका कार्यक्रम फिर्ता भएसँगै अब देशको जनजीवन सामान्य हुने भएको छ।
वर्तमान शान्ति सुरक्षाको अवस्थालाई समेत मध्यनजर गर्दै, महाअभियानले उठाएका मुद्दाहरूको सम्बोधनका लागि सरकारले निरन्तर छलफल, वार्ता र सहजीकरण गर्दै जाने सहमति भएको जनाइएको छ।
वार्तामा सरकारका तर्फबाट गृहमन्त्री ओमप्रकाश अर्याल, प्रधानमन्त्रीका मुख्य सल्लाहकार अजयभद्र खनाल र सल्लाहकार गोविन्दनारायण तिमिल्सिनालगायत सहभागी थिए।
महाअभियानका तर्फबाट सचिव प्रेमदीप लिम्बुको नेतृत्वमा अधिवक्ताद्वय विनोदमणि भट्टराई, लवण न्यौपाने र डा.नीराजन प्रसाईँ सहभागी भएका थिए।
बैठकमा महाअभियानको नेतृत्वसहित अर्को चरणको वार्ता यथाशीघ्र गर्ने समझदारी पनि बनेको छ।
