वीरगंज । वीरगंज महानगरपालिकाको नगर कार्यपालिकाको कार्यालयले संस्थागत विद्यालयहरूमा कक्षा ९ र ११ को छात्रवृत्ति वितरण प्रक्रिया विद्यालयलाई नै दिने निर्णय गरेको छ ।
भाद्र २४ गते भएको जेनजी आन्दोलनका क्रममा कार्यालयमा भएको आगजनीले सम्पूर्ण कागजातहरू र कम्प्युटरसमेत जलेर नष्ट भएपछि छात्रवृत्तिका लागि भएको छनौट परीक्षाको नतिजा प्रकाशनको काम अघि बढाउन नसकिएको महानगरले जनाएको छ ।
छनौट परीक्षा २०८२ भाद्र ६ गते सम्पन्न भई नतिजा प्रकाशनको अन्तिम चरणमा रहेको अवस्थामा आगलागीका कारण सबै अभिलेख नष्ट भएपछि उत्पन्न परिस्थितिको समीक्षा गर्दै छात्रवृत्ति व्यवस्थापन समितिको मिति २०८२ कार्तिक १३ गतेको बैठकले सम्बन्धित विद्यालयलाई नै दिएको छ ।
आगजनीका कारण छनौट प्रक्रिया महानगरबाट सम्पन्न गर्न नसकिने भएपछि, अब उप्रान्त ‘वीरगंज महानगरपालिकाको संस्थागत विद्यालय छात्रवृत्ति वितरण कार्यविधि २०७५’ अनुसार तोकिएको वर्गबमोजिम हुने गरी सम्बन्धित विद्यालयबाटै उक्त छात्रवृत्ति प्रदान गरिने भएको छ । यसअघि महानगरले परीक्षा सञ्चालन गरी छनौट गर्ने गरेको थियो ।
नगर कार्यपालिकाको कार्यालयले सम्बन्धित सबैको जानकारीका लागि सूचना प्रकाशित गर्दै विद्यालयस्तरबाटै छनोट गर्न भनिएको हो ।
प्रमुख प्रशासकीय अधिकृत अरविन्दलाल कर्णले संस्थागत विद्यालयहरुको छाता संगठन प्याब्सन, एन प्याब्सन र हिसान वीरगंज नगर कार्य समितिलाई आवश्यक समन्वय गर्न र सबै संस्थागत विद्यालयहरूलाई छात्रवृत्ति कार्यविधि, २०७५ अनुसार तोकिएको वर्गबमोजिम छात्रवृत्ति प्रदान गरी सोको जानकारी महानगरपालिकालाई पठाउन समेत आग्रह गरेका छन् ।
जेनजीको नाममा भएको आगजनीले कागजात नष्ट भएका कारण रोकिएको छात्रवृत्ति वितरणको प्रक्रियालाई अगाडि बढाउने विद्यालयलाई बाटो खोलेको छ । अब विद्यार्थीहरूले विद्यालयसँग समन्वय गरी कार्यविधि अनुसारको लाभ लिन सक्नेछन् ।
