बारा । बाराको करैयामाई गाउँपालिकाले मेलाको अवसरमा गाउँपालिकाभर एकदिनको सार्वजनिक बिदा घोषणा गरेको छ । परापूर्वकालदेखि लाग्दै आएको ऐतिहासिक करैयामाई मेला वडा नं २ करैया गाउँस्थित राजदेवीमाई मन्दिर परिसरमा कार्तिक १९ गते बुधबारका दिन लाग्ने छ ।
गाउँपालिका अध्यक्ष शम्भु प्रसाद यादवले सोमबार एक सूचना जारी गर्दै मेलामा स्थानीयवासीले हर्षोल्लासका साथ पूजा–अर्चना गर्न सहज होस् भन्ने उद्देश्यले यो बिदा दिएको जानकारी दिए ।
बिदा अतिआवश्यकबाहेकका सबै गाउँपालिका कार्यालय, वडा कार्यालय, शैक्षिक संस्था तथा बर्थिङ सेन्टरबाहेकका स्वास्थ्य संस्थामा लागू हुनेछ ।
करैयामाई मेला स्थानीय संस्कृति र धार्मिक आस्थाको प्रतीक हो । प्रत्येक वर्ष कार्तिक महिनामा लाग्ने यो मेलामा हजारौं भक्तजनहरु राजदेवीमाईको दर्शनका लागि आउने गर्छन् ।
मन्दिर परिसरमा पूजा, भजनकीर्तन, मेला तथा विभिन्न सांस्कृतिक कार्यक्रम हुने भएकाले गाउँपालिकाले बिदा दिएर सहभागितालाई प्रोत्साहन गरेको हो ।
अध्यक्ष यादवले भने, “यो मेला हाम्रो पहिचान हो । सबैले सहभागी भएर उत्सव मनाउन बिदा आवश्यक थियो ।” स्थानीयवासीहरुले यो निर्णयको स्वागत गरेका छन् । मेलाले पर्यटन र स्थानीय अर्थतन्त्रलाई पनि टेवा पुग्ने अपेक्षा गरिएको छ । मेलाको भ्रमण गर्न अनुरोध गरेको छ ।
