वीरगन्ज । वीरगन्ज पोखरिया सडकखण्डमा भएको सवारी दुर्घटनामा एकजनाको मृत्यु भएको छ । वीरगन्जबाट पोखरिया तर्फ गईरहेको बा ७३ प ४५२८ नम्बरको मोटरसाईकल वीरगन्ज महानगरपालिका वडा नम्बर १७ अलौं छगछियामा विपरित दिशाबाट आईरहेको ना ३५ प ६४०० नम्बरको मोटरसाईकलसँग आज बिहान ठोक्किएर दुर्घटना सर्लाहीको रामनगर–६ सिसौटोलका ३५ बर्षीय अभय झाको मृत्यु भएको हो ।
बा ७३ प ४५२८ नम्बरको मोटरसाईकलमा झा पोखरियातर्फ गईरहेको समयमा सोही दिशामा गईरहेको ना ८ ख ४८६१ नम्बरको यात्रुवाहक बसलाई छगछियामा उछिन्ने क्रममा विपरित दिशाबाट आईरहेको ना ३५ प ६४०० नम्बरको मोटरसाईकलसँग ठोक्किएर बसको चक्का मुनी परेका थिए ।
उनलाई उपचारका लागि अस्पताल लैजाने क्रममा बाटोमा मृत्यु भएको वडा प्रहरी कार्यालय श्रीपुरका प्रहरी निरीक्षक धर्मजंग थिङले जानकारी दिनुभयो । ना ३५ प ६४०० नम्बरका मोटरसाईकल चालक कालिकामाई गाउँपालिका वडा नम्बर २ बस्ने बर्ष २९ का अखिलेश कुमार मण्डल घाईते भएका छन् ।
घाईते मण्डलको नारायणी अस्पतालमा उपचार भईरहेको प्रहरी निरीक्षक थिङ्गले जानकारी दिनुभयो । बसका चालक सिन्धुली जिल्लाको कमलामाई नगरपालिका वडा नम्बर ७ बस्ने बर्ष ५५ का विष्णु दर्जीलाई प्रहरीले नियन्त्रणमा लिएर अनुसन्धान गरिरहेको प्रहरी निरीक्षक थिङ्गले बताउनुभयो ।