वीरगन्ज । वीरगन्ज कलेजले हिन्दुहरुको पर्व दीपावली र छठको अवसरमा शुभकामना कार्यक्रमको आयोजना गरेको छ । वीरगन्जको श्रीपूर ११ स्थित कलेजको प्रांगणमा आयोजित कार्यक्रममा शुभकामना तथा सांस्कृतिक प्रस्तुती पनि राखिएको थियो ।
कलेजका सञ्चालक समिति सदस्य तथा प्रशासन प्रमुख सुरेश प्रसाद चौधरीको अध्यक्षतामा भएको कार्यक्रमका प्रमुख अतिथि सञ्चालक समिति अध्यक्ष डा.दीपेन्द्र कुमार चौधरी रहेका थिए ।
उनले शुभकामना मन्तव्य व्यक्त गर्ने क्रममा विद्यार्थीहरुलाई नेपाली समाजमा मनाईने विभिन्न चाडपर्वहरुलाई सदभावको रुपमा मनाउने र भाईचाराको सम्बन्ध कायम राख्नका लागि शुभकामना आदान प्रदान कार्यक्रमले प्रेरणा दिने बताए ।
कलेजका विद्यार्थीहरुकै आग्रहमा शुभकामना तथा सांस्कृतिक कार्यक्रमको आयोजना गरिएको बताउदै उनले कलेजका विद्यार्थीहरुको नेपालका सांस्कृति चाडपर्वहरुप्रति देखिएको आस्था र विश्वासले सांस्कृतिक पर्वहरुको संरक्षण र सम्वद्र्धनमा सहयोग पुग्ने बताए ।
कार्यक्रममा क्याम्पस प्रमुख विनोद गुप्ता, सहायक क्याम्पस प्रमुख रुदल ठाकुर, मधेस मिडिया काउन्सिलका सदस्य निरज पिठाकोटे मगर, समाजवादी प्रेस संगठनका मधेस प्रदेश अध्यक्ष मनोज पटेल, अनलाईन वीरगन्जका सञ्चालक प्रणय साह लगायत विभिन्न संघ संस्थाका प्रतिनिधिहरुले शुभकामना मन्तव्य व्यक्त गरेका थिए ।
कार्यक्रममा वीरगन्ज कलेज, एपेक्स म्यानेज्मेण्ट कलेज र वीरगन्ज बहुमुखी क्याम्पसका फ्याकल्टी मेम्बरहरु, शिक्षक, शिक्षिका, विद्यार्थी र सञ्चारकर्मीहरुको सहभागिता रहेको थियो ।
