वीरगञ्ज । साउथ जोन माध्यमिक विद्यालयको १६ औं वार्षिकोत्सवको अवसरमा रक्तदानको आयोजना गरेको छ । वीरगन्ज महानगरपालिका वडा नम्बर १३ राधेमाई स्थित विद्यालय परिसरमार भएको कार्यक्रममा १४ महिलासहित ५३ जनाले रक्तदान गरेका छन् ।
रक्तदान गर्ने रक्तदाताहरुमा सम्झना चौधरी, सरिता झा, दिपा शर्मा, स्मिता सिलवाल, समिक्षा चौधरी, अशोक संग्रौला, राजन दास, धीरज घिमिरे, सुनिल कपुर दास, कुनाल जयसवाल, विशाल पटेल लगायतका रहेका छन् ।
विद्यालयका प्रधानाध्याक सरोज प्रसाद चौधरीको अध्यक्षतामा भएको कार्यक्रममा प्रमुख अतिथि रेडक्रस सभापति कँडेलले पहिलो रक्तदान गर्ने रक्तदातालाई रगल संकलन पर्ने पोका हस्तान्तरण गरेपछि रक्तदान कार्यक्रमको शुभारम्भ भएको थियो ।
कार्यक्रममा नेपाल रेडक्रस सोसाईटी पर्साका सभापति कँडेल, मन्त्री विनोद गिरी, प्याब्सन मधेश प्रदेशका वरिष्ठ उपाध्यक्ष श्याक केसी, ठाकुुरराम बहुमुखी क्याम्पसका पूर्व प्रमुख तथा प्राध्यापक डा.उमेश चौरसिया लगायतको उपस्थिति रहेको थियो । १६ औं वार्षिकोत्सवको अवसरमा सप्ताहव्यापी कार्यक्रम अन्तर्गत रक्तदान कार्यक्रम आयोजना भएको हो ।
मंगलबार नै विद्यालयले अभिभावकहरुका लागि पनि निःशुल्क स्वास्थ्य जाँच शिविरको आयोजना गरेको विद्यालय सहायक प्रधानाध्यापक अशोक संग्रौलाले जानकारी दिए । शिविरबाट ५० जना भन्दा बढी अभिभावकहरुले स्वास्थ्य परीक्षण गराएर लाभ लिएका थिए ।
शिविरमा चिकित्सक डा. वेदप्रकाश कुशवाहा र डा. सुशील कुमार साहको सिफारिस अनुसार आवश्यक परीक्षणहरु र औषधि समेत अभिभावकका लागि विद्यालयले निःशुल्क व्यवस्थापन गरेको संग्रौलाले बताए ।
वार्षिकोत्सवको अवसरमा आयोजना गरिएको सप्ताहव्यापी कार्यक्रम अन्तर्गत माघ १६ गते बुधबार नर्सरीदेखि कक्षा २ सम्मको खेलकुद कार्यक्रम, माघ १७ गते सामुदायिक विद्यालयका विद्यार्थीलाई शैक्षिक सामाग्री हस्तान्तरण, माघ १८ गते नर्सरीदेखि कक्षा २ सम्मको सांस्कृतिक कार्यक्रम र पुरस्कार वितरण र माघ २० गते १६ औं वार्षिकोत्सव कार्यक्रम तथा पुरस्कार वितरण कार्यक्रम आयोजना गरिएको विद्यालय सहायक प्रधानाध्यापक संग्रौलाले जानकारी दिए । बीरगन्ज महानगरपालिका वडा नं। १३ मा २०६६ साल स्थापित विद्यालयमा हाल करिब १८०० विद्यार्थी अध्ययनरत छन् ।