वीरगन्ज । बाराको कलैया बजारस्थित एक मलखाद्य पसलमा प्रहरीले छापामारी मलखाद बरामद गरेको छ । छिमेकी मुलुक भारतबाट तस्करी मार्फत ल्याएर पसलमा झार्दै गरेको अवस्थामा जिल्ला प्रहरी कार्यालय बाराबाट खटिएको टोलीले मल जफत गरेको हो।
नेपालमा खेतीपातीको समयमा वर्षेनी हुने रासायनिक मलको चरम अभावका कारण सीमावर्ती क्षेत्रका किसान र व्यवसायीहरू भारतीय बजारको भर पर्न बाध्य छन्।
पक्राउ परेका व्यवसायी र स्थानीय किसानहरूका अनुसार सरकारी संयन्त्रबाट पर्याप्त मल आपूर्ति हुन नसक्दा खेती जोगाउनका लागि नै जोखिम मोलेर भारतबाट मल ल्याउनुपर्ने अवस्था सिर्जना भएको हो।
नेपाली कृषि क्षेत्रमा मलको हाहाकार भइरहँदा एकातिर प्रहरीले कानुनी प्रक्रिया भन्दै मल जफत गरिरहेको छ भने अर्कोतिर किसानहरूले आफ्नो लगानी र श्रम बालुवामा मिल्ने चिन्ता व्यक्त गरिरहेका छन्।
यो घटनाले राज्यको आपूर्ति व्यवस्थाको कमजोरीलाई पुनः छताछुल्ल पारेको छ। सम्बन्धित निकायले समयमै मलको सहज उपलब्धता गराउन ठोस समाधान नखोज्दासम्म यस्ता समस्या र लुकिछिपी गरिने आयात रोकिने छाँटकाँट देखिँदैन।
नेपालका किसानहरुलाई राज्यले उपलब्ध गराउने अनुदानको मल अपुग हुने र भारतबाट समेत खरिद गरी ल्याउन नपाँउादा खेतीबालीमा लगाउन नपाएर उब्जनी समेत कम हुने गरेको छ । उब्जनी भएको कृषिउपजले समेत बजारमा उचित भाउ नपाउँदा किसान दोहोरो मारमा पर्ने गरेका छन् ।
