जनकपुरधाम। मधेस प्रदेशका मुख्यमन्त्री जितेन्द्र सोनलले आज (शनिबार) प्रदेशसभामा विश्वासको मत लिने भएका छन्। नेपालको संविधानको धारा १६८ को उपधारा ९४० बमोजिम मुख्यमन्त्री सोनलले विश्वासको मत लिन लागेका हुन्।
जनमत पार्टीबाट मुख्यमन्त्री बनेका सतिशकुमार सिंहले राजीनामा दिएपछि गत असोज २९ गते पाँच दलका ५६ जना प्रदेशसभा सदस्यहरूको समर्थनमा सोनल मुख्यमन्त्रीमा नियुक्त भएका थिए।
१०७ सदस्यीय प्रदेश सभामा हाल १०४ जना प्रदेशसभा सदस्य कायम छन्। विश्वासको मत प्राप्त गर्नका लागि मुख्यमन्त्री सोनललाई बहुमत अर्थात् ५३ जना प्रदेशसभा सदस्यको समर्थन आवश्यक पर्छ।
दाबी गर्ने समयमा पाँच दलको समर्थन पाएका मुख्यमन्त्री सोनललाई अहिले नागरिक उन्मुक्ति पार्टी र रिजवान अन्सारीको नेपाल संघीय समाजवादी पार्टीले समेत समर्थन गरेकाले उनीसँग कुल ५७ जना प्रदेशसभा सदस्यको समर्थन रहेको देखिन्छ।
मुख्यमन्त्री सोनललाई समर्थन गर्ने दलहरू जनता समाजवादी पार्टी नेपालका १८ जना, जनमत पार्टीका १३ जना, नेकपा माओवादी केन्द्रका ९ जना, लोकतान्त्रिक समाजवादी पार्टी नेपालका ८ जना सांसद छन त्यस्तै नेकपा एकीकृत समाजवादी पार्टीका ७ जना, नागरिक उन्मुक्ति पार्टीका १ जना, नेपाल संघीय समाजवादी पार्टीका १ जना गरी कुल ५७ जनाको समर्थन सोनललाई रहेको छ ।
प्रदेशसभाका दुई ठुला दल नेपाली कांग्रेस र नेकपा एमाले भने मुख्यमन्त्री सोनलको विपक्षमा रहेका छन्। जनमत पार्टीबाट छुट्टिएर बनेको जनस्वराज पार्टीतर्फ लागेका निवर्तमान मुख्यमन्त्री सतिश कुमार सिंह र पूर्वमन्त्री त्रिभुवन साहले भने विश्वासको मतबारे आफ्नो अडान सार्वजनिक गरिसकेका छैनन्।
यसैगरी, जनता समाजवादी पार्टी नेपालका एक जना प्रदेशसभा सदस्य सरोज सिंह कुशवहा निलम्बित रहेकाले उनले विश्वासको मत दिन पाउने छैनन्।
