पर्सागढी, पर्सा। पर्साको पर्सागढी नगरपालिकाले आर्थिक वर्ष २०८२/०८३ का लागि कुल ५६ करोड ६ लाख २ हजार ४ सय ७९ रुपैयाँको बजेट नगर सभामा प्रस्तुत गरेको छ। नगर उपप्रमुख पूजा चौधरीले नगर प्रमुख गोकर्ण पाठकको अध्यक्षतामा भएको १३ औं नगरसभामा बजेट प्रस्तुत गरेकी हुन्।
आम्दानीका स्रोतहरू
नगरपालिकाले आगामी आर्थिक वर्षका लागि विभिन्न स्रोतबाट आम्दानी हुने अनुमान गरेको छ:
- संघीय सरकार: वित्तीय समानिकरण अनुदानबापत ११ करोड ७६ लाख रुपैयाँ र सशर्त अनुदानबापत २६ करोड ९० लाख रुपैयाँ।
- राजस्व बाँडफाँट (संघ): १० करोड ६१ लाख १ हजार ८ सय ९९ रुपैयाँ।
- प्रदेश सरकार: वित्तीय समानीकरण अनुदानबापत ८२ लाख ६ हजार रुपैयाँ, सशर्त अनुदानबापत ९५ लाख रुपैयाँ, र राजस्व बाँडफाँटबाट ८० लाख ८४ हजार ५ सय ८० रुपैयाँ।
- विशेष अनुदान: ३० लाख रुपैयाँ।
- समपूरक अनुदान: २० लाख रुपैयाँ।
- आन्तरिक आय: २ करोड ७१ लाख १० हजार रुपैयाँ।
- अनुमानित मौज्दात: १ करोड रुपैयाँ।
खर्चका प्राथमिकताहरू
नगरपालिकाको कुल आयमध्ये कार्य सञ्चालन तथा प्रशासनिक खर्चका लागि ३० करोड ६४ लाख ८६ हजार ४ सय ७९ रुपैयाँ छुट्याइएको छ। यसबाहेक, अन्य प्रमुख खर्चका क्षेत्रहरू निम्नानुसार छन्:
- वडास्तरीय योजना: ६ करोड ६० लाख रुपैयाँ।
- नगरस्तरीय योजना (समपूरक कोष): ३ करोड ५० लाख रुपैयाँ।
- सशर्त अनुदान संघ (नगरस्तरीय): ४ करोड ६४ लाख रुपैयाँ।
- समपूरक अनुदान संघ: ३ करोड ३ लाख रुपैयाँ।
- प्रदेश सशर्त अनुदान: ९५ लाख रुपैयाँ।
- प्रदेश समपूरक अनुदान: २० लाख रुपैयाँ।
- प्रदेश विशेष अनुदान: ३० लाख रुपैयाँ।
- आर्थिक विकास, सामाजिक विकास, वन तथा वातावरण, संस्थागत विकास तथा सुशासन, पूर्वाधार लगायतका अन्य नगरस्तरीय योजना र गत वर्षको भुक्तानी: ६ करोड १९ लाख १६ हजार रुपैयाँ।
बजेटको विस्तृत आयव्यय विवरण र राजस्वका दरहरू अनुसूचीमा संलग्न गरिएको प्रमुख प्रशासकीय अधिकृत राजु साहले जानकारी दिएका छन्। नगरसभामा नगरसभा सदस्यहरू, कार्यपालिका सदस्यहरू, वडा अध्यक्ष तथा विभिन्न राजनीतिक दलका प्रतिनिधिहरू, संघ संस्थाका प्रतिनिधिहरू लगायत स्थानीय र सञ्चारकर्मीहरूको पनि उपस्थिति रहेको थियो।
