जनकपुरधाम । रौतहटको मौलापुरस्थित इलाका प्रहरी कार्यालयका प्रमुख तथा प्रहरी निरीक्षक भरत के.सी.लाई सम्मान गरिएको छ ।
उत्कृष्ट कार्यसम्पादन र उच्च जनसेवाको कदर गर्दै मधेश प्रदेश सरकारका गृह, सञ्चार तथा कानुनमन्त्री फकिरा महतोले प्रशंसापत्रसहित सम्मान गरेका हुन् ।
मधेश प्रदेश सरकार, गृह, सञ्चार तथा कानुन मन्त्रालयमा आयोजित एक कार्यक्रमबीच मन्त्री महतोले प्रहरी निरीक्षक के.सी.लाई दोसल्ला ओढाएर र प्रशंसापत्र प्रदान गर्दै सम्मानित गरे ।
बाढी तथा अन्य विपद्का समयमा प्रभावित नागरिकहरूको उद्धार, राहत वितरण, मानवीय सहायता, विपद् व्यवस्थापन, आपराधिक घटनाको सूक्ष्म अनुसन्धान तथा क्षेत्रमा शान्ति सुरक्षा कायम राख्न उनले पुर्याएको उल्लेखनीय योगदानको मन्त्रालयले उच्च मूल्याङ्कन गरेको छ।
साथै, नागरिकको जीवन तथा सम्पत्ति रक्षा, अपराध नियन्त्रण एवं प्रभावकारी प्रहरी सेवा प्रवाहमा उनले देखाएको उच्च व्यावसायिकता, कर्तव्यनिष्ठा र जिम्मेवारीबोधको समेत मन्त्रालयले खुलेर प्रशंसा गरेको छ।
प्रहरी सेवा प्रवाहलाई गाउँवस्तीसम्म थप प्रभावकारी, द्रुत र सहज बनाउने उद्देश्यले मन्त्री महतोले प्रहरी निरीक्षक के.सी.लाई एक थान मोटरसाइकलसमेत उपलब्ध गराएका छन् ।
उक्त सवारी साधन प्राप्त भएपछि प्रहरीको दैनिक कार्यसम्पादन, गस्ती तथा नागरिकका गुनासो र आपत्कालीन सूचनामा छिटो सेवा पुर्याउन थप सहज हुने विश्वास लिइएको छ।
सम्मान ग्रहण गर्दै प्रहरी निरीक्षक के।सी।ले प्रदेश सरकारबाट प्राप्त यस सम्मानले आफूलाई राष्ट्र र जनताको सेवामा अझ बढी जिम्मेवार, इमानदार र उत्साहित बनाएको प्रतिक्रिया दिए ।
उनले प्रोत्साहनका लागि मन्त्री महतोप्रति कृतज्ञता व्यक्त गर्दै आगामी दिनमा पनि जनउत्तरदायी भएर कर्तव्यपथमा अडिग रहने प्रतिबद्धता व्यक्त गरे ।
मधेश प्रदेश सरकारको यस किसिमको प्रोत्साहनले सुरक्षा संगठनमा खटिने इमानदार र कतव्यनिष्ठ कर्मचारीहरूको मनोबल उच्च हुनुका साथै समग्र क्षेत्रमा शान्ति सुरक्षा सुदृढ गर्न सकारात्मक टेवा पुग्ने विश्वास गरिएको छ।
कार्यक्रममा मन्त्री महतो, निमित्त प्रदेश सचिव निशा न्यौपाने, मधेस प्रदेश प्रहरी प्रमुख प्रहरी नायव महानिरीक्षक ओम प्रसाद अधिकारी लगायत गृह, सञ्चार तथा कानून मन्त्रालयका कर्मचारीहरुको उपस्थिति रहेको थियो ।
