मलङ्गवा : सर्वोच्च अदालतका तत्कालीन न्यायाधीश रणबहादुर बमको गोली हानी हत्या गर्ने घटनाका फरार मुख्य प्रतिवादी मेघराज भन्ने बाबु थापा अटोमेटिक पेस्तोल, म्याग्जिन र ठूलो परिमाणको गोलीसहित पक्राउ परेका छन्।
विशेष सुराकीका आधारमा जिल्ला प्रहरी कार्यालय सर्लाही र इलाका प्रहरी कार्यालय हरिवनको संयुक्त टोलीले सर्लाहीको बागमती नगरपालिका–१ स्थित आफ्नै घरमा लुकिछिपी बसिरहेको अवस्थामा उनलाई पक्राउ गरेको हो।
प्रहरी टोलीले थापाको घर तथा शरीर खानतलासी गर्दा ‘MADE IN U.S.A’ लेखिएको पेस्तोल १ थान, अर्को पहिचान नखुलेको पेस्तोल १ थान, म्याग्जिन ३ थान, १५ राउन्ड गोली, दुई थान मोबाइल र नगद १७ हजार ११२ रुपैयाँ बरामद गरेको जिल्ला प्रहरी कार्यालय सर्लाहीका प्रहरी प्रवक्ता प्रहरी नायब उपरीक्षक वेदप्रसाद गौतमले जानकारी दिए।
ललितपुर जिल्ला अदालतबाट कर्तव्य ज्यान र ज्यान मार्ने उद्योग मुद्दामा २० वर्ष कैद सजाय पाएका थापा २०७१ पुस १९ गतेदेखि केन्द्रीय कारागार जगन्नाथदेवलमा कैद भुक्तान गरिरहेका थिए। तर, २०८२ भदौ २३ गते ‘Gen-Z’ आन्दोलनको क्रममा कारागारबाट फरार भई उनी लुकिछिपी बस्दै आएका थिए।
पक्राउ परेका थापामाथि यसअघि पनि हातहतियार तथा खरखजाना, सार्वजनिक शान्तिविरुद्धको कसूर, ज्यान मार्ने उद्योग, केही सार्वजनिक अपराध र चोरी लगायतका ११ वटा मुद्दा दर्ता भइसकेको प्रहरीले जनाएको छ। उनलाई प्रहरी नियन्त्रणमा राखेर थप अनुसन्धान अघि बढाइएको जिल्ला प्रहरी कार्यालय सर्लाहीले जनाएको छ ।
