वीरगञ्ज । वीरगञ्जस्थित नेशनल मेडिकल कलेजमा व्यापक अनियमितता र बेथिति भएको भन्दै यो मुद्दा संसदमा जोडतोडका साथ उठेको छ। पटक पटक विवादमा तानिने गरेको वीरगन्जको नेशनल मेडिकल कलेजको पछिल्लो विवादको विषयमा संसदमा प्रश्न उठेको हो ।
प्रतिनिधि सभाको बैठकमा बोल्दै सांसद रहबर अन्सारीले मेडिकल कलेजले नक्कली चिकित्सक (Fake Faculty) र नक्कली बिरामी (Fake Patient) खडा गरेर गैरकानुनी धन्दा सञ्चालन गरिरहेको गम्भीर आरोप लगाएका छन्।
सांसद अन्सारीले चलचित्र ‘मुन्ना भाइ एमबीबीएस’ पर्दामा हेर्दा रमाइलो लागे पनि वास्तविक जीवनका मेडिकल कलेजहरूमा त्यस्तै दृश्य र प्रवृत्ति दोहोरिनु राष्ट्रको स्वास्थ्य क्षेत्रका लागि अत्यन्तै चिन्ताजनक विषय भएको टिप्पणी गरे।
उनले अनुगमन र निरीक्षणका बेला पूर्वाधार तथा जनशक्ति पुर्याएको देखाउन नक्कली व्यवस्था खडा गर्ने र निरीक्षण सकिएपछि गायब पार्ने प्रवृत्तिको कडा शब्दमा भर्त्सना गरे।
संसदमा बोल्दै सांसद अन्सारीले विद्यार्थीहरूबाट तोकिएको भन्दा अस्वाभाविक र अतिरिक्त शुल्क असुल गर्ने, जरिवानाका नाममा मानसिक दबाब दिने, आवाज उठाउने Post Graduate (PG) तथा अध्ययनरत विद्यार्थीहरूमाथि गैरकानुनी कारबाही गर्ने जस्ता गतिविधि भइरहेको बताए।
कलेज प्रशासनको यस्तो रवैयाले योग्य चिकित्सक उत्पादन हुनुको सट्टा नागरिकको जीवनमाथि नै खेलबाड भइरहेको भन्दै उनले नियमाक निकायहरूको ध्यानाकर्षण गराएका छन्।
उनले चिकित्सा शिक्षा आयोग (MEC) र त्रिभुवन विश्वविद्यालयको डीन कार्यालयलाई तत्काल निद्राबाट ब्युँझिएर कलेजमा भइरहेका यी तमाम गतिविधिमाथि निष्पक्ष छानबिन गर्न माग गरे।
मेडिकल शिक्षा केवल प्रमाणपत्र बाँड्ने व्यापार नभएर नागरिकको जीवन र स्वास्थ्यसँग प्रत्यक्ष जोडिएको संवेदनशील विषय भएकाले नक्कली संरचनाले अनुगमन पास गरे पनि नक्कली दक्षताले बिरामीको ज्यान बचाउन नसक्ने स्पष्ट पारिएको छ।
