वीरगञ्ज । वीरगञ्ज महानगरपालिकाले नगर क्षेत्रभित्र सञ्चालित सबै सामुदायिक तथा संस्थागत (निजी) विद्यालयहरूलाई प्रत्येक शनिवार र आइतबार अनिवार्य रूपमा नियमित सातान्त बिदा दिन कडा निर्देशन दिएको छ।
शिक्षा तथा खेलकुद मन्त्रालयको मिति २०८३-०२-११ गतेको मन्त्रीस्तरीय निर्णय बमोजिम शैक्षिक संस्थाहरूमा शनिवार र आइतबार सार्वजनिक बिदा दिने व्यवस्था कार्यान्वयन गर्न स्थानीय तहलाई अनुरोध गरिएको थियो।
सोही निर्णय विपरीत वीरगञ्जका केही संस्थागत विद्यालयहरूले आइतबारसमेत नियमित रूपमा पठनपाठन सञ्चालन गरिरहेको गुनासो प्राप्त भएपछि महानगरपालिकाले यो ताकेता गरेको हो।
नगर शिक्षा समितिको मिति २०८३ असोज ५ गतेको निर्णयानुसार शैक्षिक प्रशासन महाशाखाले असोज १३ गते पत्राचार गर्दै महानगरभित्रका सम्पूर्ण विद्यालयहरूमा पठनपाठन सञ्चालनमा एकरूपता कायम गर्न ताकेता गरेको छ।
महानगरपालिकाका शैक्षिक प्रशासन महाशाखा प्रमुख आनन्द लामिछानेका अनुसार हप्तामा दुई दिन बिदा दिँदा पनि विद्यार्थीहरूको वार्षिक पठनपाठन समय तथा कार्यघण्टा घट्न दिइने छैन।
यसका लागि शिक्षा तथा मानव स्रोत विकास केन्द्र एवम् पाठ्यक्रम विकास केन्द्रबाट जारी निर्देशन अनुसार दैनिक पठनपाठन समय, वार्षिक शैक्षिक क्यालेन्डर र अन्य बिदाहरू समायोजन गरेर स्वीकृत पाठ्यक्रम अनुसार तोकिएको वार्षिक कार्यघण्टा अनिवार्य पूरा गर्न निर्देशन दिइएको छ।
