वीरगन्ज — सुनसरीको घटनापश्चात उत्पन्न असहज परिस्थितिलाई मध्यनजर गर्दै देशको शान्ति–सुरक्षा अवस्थालाई थप सुदृढ बनाउन खटाईएका सशस्त्र प्रहरी बल नेपालका अतिरिक्त महानिरीक्षक (एआईजी) गणेशबहादुर ठाडा मगरले मधेस प्रदेशका विभिन्न जिल्लामा सुरक्षा अनुगमन तथा अन्तरक्रिया कार्यक्रमलाई तिब्र बनाएका छन् ।
अनुगमनका क्रममा उनले बर्दिबास, जनकपुर, मटिहानी, सम्सी लगायतका संवेदनशील क्षेत्रहरूको स्थलगत निरीक्षण र स्थानीयसँग छलफल पनि गरेका छन् ।
सोही सिलसिलामा जिल्ला सुरक्षा समिति, प्रमुख जिल्ला अधिकारी, नेपाल प्रहरी र सशस्त्र प्रहरी बलका कार्यालय प्रमुखहरू, बिओपी सम्सीमा कार्यरत सुरक्षाकर्मी तथा सम्बन्धित निकायका पदाधिकारीहरूसँग सीमा सुरक्षा, सूचना आदान–प्रदान र अन्तरनिकाय समन्वयका विषयमा विस्तृत छलफल गरिएको छ।
छलफलमा एआईजी ठाडा मगरले शान्ति–सुरक्षा व्यवस्थापनलाई थप प्रभावकारी बनाउन, सम्भावित संवेदनशील गतिविधिप्रति उच्च सतर्कता अपनाउन र नागरिकको सुरक्षालाई पहिलो प्राथमिकतामा राख्न कूटनैतिक तथा व्यावहारिक निर्देशन दिएका छन् ।
मटिहानीको ऐतिहासिक सद्भाव जोगाउन आग्रहमहोत्तरीको गौशालामा आयोजित विशेष अन्तरक्रिया कार्यक्रममा प्रतिनिधिसभा सदस्य प्रमोद कुमार महतो, स्थानीय जनप्रतिनिधि, बुद्धिजीवी, समाजसेवी, धार्मिक अगुवा तथा विभिन्न समुदायका प्रतिनिधिहरूसँग एआईजी ठाडा मगरले गम्भीर संवाद गरेका छन् ।
सो अवसरमा उनले महोत्तरीस्थित ऐतिहासिक एवं धार्मिक नगरी मटिहानी प्राचीनकालदेखि नै शिक्षा, संस्कृति, धार्मिक सहिष्णुता, सामाजिक सद्भाव र आपसी भाइचाराको अनुपम केन्द्र रहेको स्मरण गराए ।
मटिहानीको गौरवशाली इतिहास र सौहार्दपूर्ण सम्बन्ध नै सिङ्गो मधेसको पहिचान भएको उल्लेख गर्दै उनले कुनै पनि अफवाह, उक्साहट वा सामाजिक सद्भाव बिथोल्ने गतिविधिको प्रभावमा नपर्न सबै पक्षलाई जोडदार आग्रह गरे ।
‘पुस्तौंदेखि कायम रहँदै आएको सामाजिक एकता, आपसी विश्वास र भाइचाराको संस्कृतिलाई सुदृढ बनाउँदै त्यसको सकारात्मक सन्देश देशभर फैलाउन स्थानीय समुदाय, जनप्रतिनिधि, नागरिक समाज र सुरक्षा निकायको साझा सहकार्य अपरिहार्य छ।’ — एआईजी गणेशबहादुर ठाडा मगर
नागरिक सुरक्षा र कानुनको शासनमा जोडएआईजी ठाडा मगरले शान्ति, सुरक्षा र सामाजिक सद्भाव अक्षुण्ण राख्न सुरक्षा निकाय र नागरिक समाजबीचको दूरी घटाएर सहकार्यलाई अझ मजबुत पार्नुपर्ने आवश्यकता औँल्याए ।
कानुनको शासन, सामाजिक एकता र नागरिक सुरक्षाको संरक्षण गर्न सशस्त्र प्रहरी बल नेपाल सदैव कटिबद्ध रहेको स्पष्ट पार्दै उहाँले मधेसको शान्ति सुरक्षालाई खलल पार्ने तत्कत्वहरूमाथि सुरक्षा निकाय कडा रूपमा प्रस्तुत हुने चेतावनीसमेत दिएका छन् ।
