वीरगन्ज । राष्ट्रिय स्वतन्त्र पार्टी रास्वपाको वीरगन्ज महानगरपालिकाको प्रथम अधिवेशन आईतबार हुदैछ । वीरगन्जको बसपार्कमा रहेको होटल सोल्टी गार्डेनमा भएको अधिवेशनको उदघाटन सत्रमा पार्टीका केन्द्रीय सचिव तथा संगठन विभाग प्रमुख शंकर श्रेष्ठले उदघाटन गरेका थिए ।
उदघाटनसत्रपछि महानगरको नयाँ नेतृत्वका लागि निर्वाचन प्रकृया पनि शुरु भएको जिल्ला सभापति तथा पर्सा क्षेत्र नम्बर १ का सांसद हरि पन्तले जानकारी दिए । महानगरको अध्यक्षका लागि अमन आलम र दीपराज पटेलले उम्मेदवारी दिएका छन् ।
रास्वपाले लोकतान्त्रिक विधि मार्फत नयाँ नेतृत्व चयन गर्ने गरी निर्वाचन शुरु गरिएको सभापति पन्तले बताए । महानगर अधिवेशनमा सञ्चारकर्मीहरुलाई निषेध गरेको भनेर विभिन्न सामाजिक सञ्जालमा आएको विषयमा उनले आपत्ति जनाएका छन् ।
उदघाटन सत्र सकिएपछि बन्दसत्र शुरु भएकोले बन्दसत्रमा महानगरका प्रतिनिधिहरु बाहेक कोही पनि पार्टीकै सदस्यहरु पनि प्रवेश गर्न नपाउने भएकोले त्यसलाई नबुझेर सामाजिक सञ्जालमा हाल्नु उचित नभएको बताए ।
सञ्चारकर्मीहरुले पनि संगठनको विधि, पद्धति र प्रकृयालाई राम्रोसँग अध्ययन गरेर मात्रै बाहिर आम नागरिकलाई सूचना दिनुपर्नेमा कुरै नबुझी सामाजिक सञ्जालमा जथाभावी लेख्दा सञ्चार माध्यम र सञ्चारकर्मीहरुको गरिमा र विश्वसनीयतालाई पनि ख्याल गर्न आग्रह गरे ।
कुनैपनि संस्थाको उदघाटनसत्रपछि बन्दसत्रमा पार्टीका आन्तरिक जीवनको बारेमा छलफल हुने भएकोले तोकिएका प्रतिनिधिहरु बाहेक अन्य व्यक्तिलाई प्रवेश निषेध गरिने विषयलाई समेन ख्याल नगरी सिधै सञ्चार माध्यमलाई प्रवेश निषेध गरिएको विषय मात्रै आम जनतामाझ पु¥याउँदा त्यसले कसैलाई पनि फाईदा नहुने सभापति पन्तको भनाई छ ।
