वीरगन्ज । मधेश प्रदेशका विभिन्न जिल्लामा मापदण्ड विपरितका नम्बर प्लेटका सवारी साधनलाई कारवाही गरेर डेढलाख राजस्व संकलन गरेको छ ।
राजमार्ग सुरक्षा तथा ट्राफिक व्यावस्थापन कार्यालय मधेस प्रदेश पथलैयाले मापदण्ड विपरीत राखिएका नम्बर प्लेट विरुद्ध चेकजाँच अभियान मार्फत उक्त राजस्व संकलन गरेको हो।
नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय पथलैया, बारा र मातहतका जिल्ला ट्राफिक प्रहरी कार्यालयहरूले गत २०८२ जेठ ६ गतेदेखि २०८३ जेठ १२ गतेसम्मको अवधिमा विशेष चेकिङ अभियानमा चलाएको थियो ।
यस अवधिमा प्रदेशभर कुल १९ हजार ६ सय ८४ वटा सवारी साधनको विशेष जाँच गरिएको राजमार्ग सुरक्षा तथा ट्राफिक व्यावस्थापन कार्यालय मधेस प्रदेश पथलैयाले जनाएको छ ।
जाँच गरिएका सवारी साधनमध्ये १६ हजार ८ सय ८९ वटाको नम्बर प्लेट मापदण्ड अनुसार सही फेला परेको छ भने २ हजार ६३ वटा सवारी साधनमा मापदण्ड विपरितका नम्बर प्लेट प्रयोग भएको पाइएको छ ।
ट्राफिक प्रहरीले जाँचका क्रममा कैफियत भेटिएका १ हजार ४ सय ९२ वटा सवारी साधनको नम्बर प्लेट तत्काल सुधार गराएको छ ।
नियम उल्लंघन गर्ने १ सय ६३ वटा सवारी साधनलाई कारबाहीको दायरामा ल्याइएको छ । सो कारबाहीबाट कुल १ लाख ५३ हजार रुपैयाँ राजस्व संकलन भएको ट्राफिक व्यवस्थापन कार्यालयले जनाएको छ ।
जिल्लागत विवरण अनुसार सबैभन्दा बढी सवारी साधनको जाँच धनुषा जिल्लामा भएको छ । जिल्ला ट्राफिक प्रहरी कार्यालय धनुषाले ५ हजार ५६ वटा सवारी जाँच गर्दा ५ सय ४१ वटामा मापदण्ड विपरितको नम्बर प्लेट फेला पारेको थियो ।
धनुषाले ४ सय २१ सवारीको नम्बर प्लेट सुधार गराई १७ वटालाई कारबाही गरेर २६ हजार ५ सय रुपैयाँ राजस्व उठाएको छ ।
सवारी जाँचमा दोस्रो स्थानमा रहेको महोत्तरीमा ३ हजार ४ सय २३ सवारी जाँच गरी ३ सय ४ वटामा कैफियत फेला पारिएको थियो, जसमध्ये २ सय ५१ वटालाई सुधार गराइएको छ ।
यस्तै, पर्सा जिल्लामा ३ हजार ७६ सवारी साधन जाँच गर्दा १ सय ५२ वटामा कैफियत देखिएको थियो । पर्साले १ सय ३० वटा सवारीको नम्बर प्लेट सुधार गराउनुका साथै ३४ वटा सवारीलाई कारबाही गरी सबैभन्दा बढी ८३ हजार रुपैयाँ राजस्व संकलन गरेको छ ।
नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय पथलैया, बारा आफैले पनि यस अवधिमा १ हजार ६ सय सवारी साधनको जाँच गरेको छ ।
जसमध्ये ८ सय ४० वटाको नम्बर प्लेट सही पाइएको र ४० वटामा कैफियत देखिएकोमा ५१ वटालाई कारबाहीको प्रक्रिया अगाडि बढाइएको छ ।
अन्य जिल्लाहरूको विवरण हेर्दा सर्लाहीमा १ हजार ७ सय ७५, सिराहामा १ हजार ४ सय ८१, सप्तरीमा ७ सय ३२, रौतहटमा १ हजार ८ सय ९६ र बारामा ६ सय ४५ सवारी साधनको नम्बर प्लेट केन्द्रित विशेष जाँच गरिएको छ ।
राजस्व संकलनतर्फ बाराले १८ हजार, सप्तरीले १२ हजार ५ सय, सिराहाले ८ हजार ५ सय र रौतहटले २ हजार ५ सय रुपैयाँ संकलन गरेका छन् ।
सवारी दुर्घटना न्यूनीकरण, आपराधिक क्रियाकलापमा चोरीका सवारीको प्रयोग नियन्त्रण तथा स्पष्ट पहिचानका लागि स्पष्ट र मापदण्ड बमोजिमको नम्बर प्लेट अनिवार्य हुनुपर्ने भएकाले यो अभियानलाई अझ तीव्रता दिइने ट्राफिक प्रहरीले जनाएको छ ।
