वीरगन्ज । जिल्ला प्रहरी कार्यालय पर्साले अपराध नियन्त्रण र अनुसन्धानको पाटोमा उल्लेखनीय उपलब्धि हासिल गरेको छ।
जिल्ला प्रहरी कार्यालय पर्सा र मातहतका निकायहरूले सार्वजनिक गरेको पछिल्लो तथ्याङ्क अनुसार जिल्लामा विभिन्न प्रकृतिका कुल १४७ वटा अपराधका मुद्दा दर्ता भएका छन्।
जिल्ला प्रहरी कार्यालय पर्साले उपलब्ध गराएको तथ्यांक अनुसार दर्ता भएका मुद्दाहरूमध्ये सबैभन्दा धेरै सामाजिक अपराधसँग सम्बन्धित रहेका छन्, जसको संख्या ३९ पुगेको छ।
यसैगरी महिला तथा बालबालिका सम्बन्धी २६ वटा, चोरीका ९ वटा, आत्महत्याका ८ वटा, सङ्गठित तथा आर्थिक अपराधका ९ वटा, ज्यान सम्बन्धी २ वटा र सवारी ज्यानका २ वटा मुद्दा दर्ता भएका छन्।
अन्य विभिन्न प्रकृतिका ४९ वटा अपराधका घटना दर्ता भएको प्रहरीको विवरणमा उल्लेख छ।
जघन्य तथा गम्भीर अपराध तर्फ पनि प्रहरीले कडा निगरानी बढाएको देखिएको छ। यस अवधिमा कर्तव्य ज्यान, हातहतियार र मानव बेचबिखन जस्ता गम्भीर प्रकृतिका अपराध नियन्त्रणमा प्रहरी सक्रियतापूर्वक लागेको छ।
आर्थिक अपराध अन्तर्गत बैंकिङ् कसूरका ३३ वटा, ठगीका ६ वटा र जुवातासका ३ वटा गरी कुल ४२ वटा घटना दर्ता भएका छन्।
अपराध अनुसन्धान र कानुनी दायरामा ल्याउने क्रममा प्रहरीले फरार तथा चालु मुद्दाका प्रतिवादीहरूलाई समात्ने कार्यमा ठूलो सफलता हासिल गरेको छ।
जिल्ला प्रहरी कार्यालय तथा मुद्दा चल्ने मातहतका प्रहरी एकाइहरूले विभिन्न मुद्दामा संलग्न रहेका १०६ जना प्रतिवादीहरूलाई पक्राउ गर्न सफल भएका छन्।
सार्वजनिक चासोका रूपमा रहेका र लामो समयदेखि थन्किएका पेण्डिङ्ग मुद्दाहरूको अनुसन्धानलाई पनि प्रहरीले तिव्रता दिएको छ।
यसै क्रममा सर्वसाधारणको चासो रहेको एउटा सवारी ज्यान मुद्दा र एउटा कर्तव्य ज्यान मुद्दाको सफल अनुसन्धान गरी फछ्र्यौट गरिएको जिल्ला प्रहरी कार्यालय पर्साका प्रवक्ता प्रहरी नायव उपरीक्षक हरि बहादुर बस्नेतले जानकारी दिए ।
