वीरगन्ज । नेपाल पत्रकार महासंघको आयोजनामा वीरगन्जमा ‘निर्वाचन रिपोर्टिङ र आचारसंहिता’ विषयक एकदिने अभिमुखीकरण कार्यक्रम सम्पन्न भएको छ। निर्वाचनको समयमा सञ्चारकर्मीले पालना गर्नुपर्ने व्यावसायिक मर्यादा र आचारसंहिताको महत्वबारे छलफल गर्न आयोजित सो कार्यक्रममा सहभागी वक्ताहरूले सत्य, तथ्य र निष्पक्ष सूचना सम्प्रेषणमा जोड दिएका छन्।
कार्यक्रमका प्रमुख अतिथि जिल्ला प्रशासन कार्यालय पर्साका प्रमुख जिल्ला अधिकारी भोला दाहालले निर्वाचनका बेला जनतामा सूचनाको चासो र अपेक्षा बढी हुने उल्लेख गर्दै सञ्चार माध्यमलाई जिम्मेवार बन्न आग्रह गरे ।
आचारसंहिता आफैँले पालना गर्ने नियम भएको बताउँदै दाहालले यसलाई पालना गरेमा मात्र यसको सान्दर्भिकता रहने र बेवास्ता गरेमा यो कागजको खोस्टो सरह हुने टिप्पणी गरे । निर्वाचनलाई निष्पक्ष, भयरहित र धाँधलीरहित बनाउन सञ्चार क्षेत्रको भूमिका अपरिहार्य रहेको उनको भनाइ थियो।
प्रतिनिधिसभा निर्वाचन क्षेत्र नम्बर २ का निर्वाचन अधिकृत मधुसुदन आचार्यले प्रचलित कानुनले दिएको अधिकार र सीमा बुझेमा मात्रै पनि आचारसंहिताको उल्लंघन नहुने स्पष्ट पारे । उनले आचारसंहिता निर्वाचनको समयमा मात्र नभई वर्षको ३६५ दिन नै लागू हुनुपर्नेमा जोड दिँदै विषयवस्तु नबुझी हतारमा समाचार सम्प्रेषण गर्दा समाजमा जोखिम बढ्न सक्ने चेतावनी दिए ।
नेपाल पत्रकार महासंघका केन्द्रीय सचिव अशोक तिवारीले पत्रकारिताको मर्यादा कायम राख्न महासंघले अभियान नै चलाएको जानकारी दिए । उनले विगतमा वीरगन्जमा पत्रकारिताकै कारण उत्पन्न केही संवेदनशील परिस्थितिको स्मरण गराउँदै पत्रकारहरूलाई संयमित र सचेत रहन आग्रह गरे ।
त्यस्तै, विश्व पत्रकार संघका सहसचिव दीपेन्द्र चौहानले ठूला सञ्चार माध्यम र ‘पेड न्युज’ को प्रवृत्तिले आचारसंहिता उल्लंघनको चुनौती थपेको बताए । केन्द्रीय लेखा समिति संयोजक केसी लामिछानेले २०५० सालको वीरगन्ज घोषणापत्रले नै आचारसंहिताको जग बसालेको स्मरण गराउँदै वीरगन्जमै आचारसंहिता उल्लंघन हुनु लज्जास्पद हुने बताए ।
महासंघकी उपाध्यक्ष नितु पण्डितको अध्यक्षतामा सम्पन्न उक्त कार्यक्रमको सञ्चालन मधेस प्रदेश अध्यक्ष श्याम बञ्जाराले गरेका थिए, भने स्वागत मन्तव्य पर्सा शाखाका अध्यक्ष ओमप्रकाश खनालले राखेका थिए । कार्यक्रममा पर्सादेखि सप्तरीसम्मका महासंघका पदाधिकारी, केन्द्रीय सदस्यहरू र स्थानीय सञ्चारकर्मीहरूको ठूलो उपस्थिति रहेको थियो।
