बुटवल | राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङदेनले मतदाताहरूलाई आफ्नो मताधिकार प्रयोग गर्नुअघि गम्भीरतापूर्वक विचार गर्न आग्रह गरेका छन्। आइतबार बुटवलमा आयोजित चुनावी सभालाई सम्बोधन गर्दै उनले भोट केवल कागजको टुक्रा नभई जनताको ‘शक्ति’ भएको टिप्पणी गरे।
अध्यक्ष लिङदेनले विगतका निर्वाचनहरूमा मतदाताहरू विभिन्न प्रलोभनमा पर्ने गरेको भन्दै सचेत गराए। उनले भने, “आजसम्म हामी झुटो आश्वासन, केही लिटर पेट्रोल, केही सय रुपैयाँ, वा माछामासु र जाँडरक्सीको प्रलोभनमा परेर मतदान गर्दै आयौँ। कतिपयले नातागोता वा परम्परागत रूपमा बाउबाजेले बोकेको पार्टी भन्दै भोट हाले। तर अब समय बदलिएको छ।”
उनले थपे, “भोट शक्ति हस्तान्तरण गर्ने प्रक्रिया हो। त्यसैले आफ्नो शक्ति कसलाई सुम्पिँदै छु भन्ने कुरा मतदान गर्नुअघि हजार पटक सोच्नुहोला।”
आफ्नो राजनीतिक निष्ठाको चर्चा गर्दै लिङदेनले आफ्नो जीवनमा एक रुपैयाँ पनि भ्रष्टाचार नगरेको दाबी गरे। पोखरा अन्तर्राष्ट्रिय विमानस्थलको भ्रष्टाचार काण्ड छानबिनमा आफूले महत्वपूर्ण भूमिका निर्वाह गरेको स्मरण गराउँदै उनले भ्रष्टाचारविरुद्ध राप्रपा सधैँ अडिग रहने बताए।
वर्तमान राजनीतिक अवस्थाप्रति टिप्पणी गर्दै उनले सत्तासीन दलहरूले आफ्ना गल्ती नसच्याए देश ठुलो दुर्घटनामा फस्न सक्ने चेतावनी दिए। उनले भने:
“सत्तामा बस्ने नेताहरूले नयाँ समझदारी नगर्ने र पुराना गल्ती दोहोर्याइरहने हो भने देशले ठुलो मूल्य चुकाउनुपर्ने हुन्छ।”
राप्रपासँग देश विकासको स्पष्ट खाका रहेको दाबी गर्दै उनले नेपाली कांग्रेस, नेकपा एमाले र माओवादी केन्द्रका समर्थकहरूलाई समेत यस पटक राप्रपाको चुनाव चिन्ह ‘हलो’ मा मतदान गरी परिवर्तनको संवाहक बन्न आह्वान गरे।
