वीरगन्ज । प्रतिनिधि सभा निर्वाचनको सरगर्मी बढ्दै जाँदा पर्सा निर्वाचन क्षेत्र नम्बर ३ मा नेकपा (एमाले) भित्रको आन्तरिक कलह विष्फोटक बनेको छ।
पार्टीले तय गरेका उम्मेदवार पाण्डेविरुद्ध तल्लो तहका कार्यकर्ताहरूले खुला रूपमा विद्रोहको घोषणा गर्दै बहिष्कारको चेतावनी दिएका छन्। यो विवाद सडकदेखि सामाजिक सञ्जालसम्म पोखिएपछि एमालेको संगठनात्मक संरचना नै धरमराउन थालेको छ।
स्थानीय कार्यकर्ताहरूले पाण्डेलाई जनताको प्रतिनिधि नभई ‘ठेकेदारका उम्मेदवार’ को संज्ञा दिएका छन्। जिल्लाका सीमित शीर्ष नेताहरूको ‘सेटिङ’ मा टिकट वितरण गरिएको आरोप लगाउँदै उनीहरूले नेतृत्वलाई खुला चुनौती दिएका छन्।
विशेषगरी जिल्लादेखि केन्द्रसम्म नेतृत्व गर्ने नेताहरूको भूमिकाप्रति कार्यकर्ताहरूले कडा आक्रोश व्यक्त गरेका छन्। ‘खल्तीबाट निकालेर बनाइएका उम्मेदवारलाई अब उनीहरूले नै जिताएर देखाउन्,’ भन्दै चिढिएका कार्यकर्ताहरूले नेतृत्वको अदूरदर्शितामाथि प्रश्न उठाएका छन्।
पार्टीभित्रको यही तीव्र असन्तुष्टिका बीच एमाले पर्साका जिल्ला उपसचिव सञ्जिव मिश्रले पार्टी परित्यागको घोषणा गरेका छन्। १५ वर्ष लामो राजनीतिक यात्रामा युवासंघको जिम्मेवारीदेखि जिल्ला कमिटी र मधेश प्रदेश कमिटी सदस्यसम्मको भूमिका निभाएका मिश्रले आत्मसम्मान र विचारलाई मुख्य कारण देखाउँदै एमालेबाट अलग हुने निर्णय लिएका हुन्।
उनले आफ्नो १५ वर्षको योगदानको मूल्याङ्कन नभएको र पार्टी गलत दिशामा अघि बढेको संकेत गर्दै आगामी यात्रा सत्य र निष्ठाको जगमा हुने स्पष्ट पारेका छन्। मिश्र क्षेत्र नम्बर ३ का मतदाता पनि हुन् । उनी नेकपा एमालेका नेता तथा पूर्वमन्त्री राजकुमार गुप्ताको स्वकीय सचिव समेत रहेर काम गरिसकेको र जनाधार भएका नेता पनि हुन् ।
जनाधार भएका नेताहरुले स्थान नपाउने तर, वडा सदस्य समेत जिताउन नसक्ने व्यक्तिहरुले जिल्लादेखि केन्द्रसम्म ठेक्का लिने गरेकै कारण मिश्रले पार्टी छाडेको बुझ्न सकिन्छ । उनको एमाले परित्यागले पाण्डेलाई ठूलो धक्का लाग्ने भएको छ ।
यो घटनाले पर्सा एमालेभित्र मौलाउँदै गएको ‘ठेकेदार संस्कृति’ र गुटबन्दीलाई छताछुल्ल पारेको छ। निष्ठावान कार्यकर्ताहरूलाई पाखा लगाएर शक्ति र पहुँचका आधारमा उम्मेदवार लादिएपछि उत्पन्न यो ‘घरभित्रको डढेलो’ फागुन २१ गते हुने निर्वाचनमा एमालेका लागि निकै महँगो साबित हुने देखिएको छ।
आफ्नै मेरुदण्ड मानिने कार्यकर्ताको विश्वास गुमाएका उम्मेदवारले आम मतदाताको मन कसरी जित्लान् ? भन्ने प्रश्न अहिले पर्सा–३ को राजनीतिक वृत्तमा पेचिलो बनेको छ। यसो त नेकपा एमलेका उम्मेदवार पाण्डे विवादै विवादको घेरामा छन् ।
एकातिर १२ करोडको बैंकिङ बक्यौताका कारण उम्मेदवारी खारेजीको उजुरी निर्वाचन अधिकृतको कार्यालयमा परेको छ । अर्कोतिर विवादित विगत भएका पाण्डेलाई प्रशासनले सुटुक्क अंगरक्षक (पिएसओ) उपलब्ध गराउनुले सुरक्षा संयन्त्रको निष्पक्षतामाथि नै शंका उब्जाएको छ।
निर्वाचनको समयमा शान्ति सुरक्षा कायम गर्नु पर्ने प्रशासनले एउटा विवादित उम्मेदवारको “रवाफ” बढाउन प्रहरी परिचालन गर्नु लोकतान्त्रिक मूल्य मान्यता विपरीत भएको बुद्धिजीविहरुले बताउने गरेका छन् ।
