दमक, झापा — आसन्न प्रतिनिधिसभा निर्वाचनको मिति नजिकिएसँगै झापा निर्वाचन क्षेत्र नम्बर ५ मा नेकपा (एमाले) ले आफ्नो चुनावी अभियानलाई निकै आक्रामक बनाएको छ। एमाले अध्यक्ष एवं पूर्वप्रधानमन्त्री केपी शर्मा ओली आफैँ उम्मेदवार रहेको यस क्षेत्रमा एमाले कार्यकर्ताहरू अध्यक्ष ओलीको विशेष ‘पत्र’ लिएर मतदाताको घर–घरमा पुग्न थालेका छन्।
झापा ५ का २९ वटै वडाका प्रत्येक टोलमा एमालेले घरदैलो अभियानलाई तीव्रता दिएको छ। निर्वाचन परिचालन समितिका संयोजक देवेन्द्र दाहालका अनुसार क्षेत्रभरिका प्रत्येक घरधुरीमा पार्टी अध्यक्षको व्यक्तिगत पत्र, पार्टीको चुनावी प्रतिबद्धता पत्र र विभिन्न जनवर्गीय सङ्गठनका घोषणापत्रहरू पुर्याउने लक्ष्य राखिएको छ।
निर्वाचन परिचालन समितिका अनुसार दमक नगरपालिकाका वडा नम्बर ६ र ७ मा दोस्रो चरणको घरदैलो सम्पन्न भइसकेको छ भने बाँकी ८ वटा वडाहरूमा अभियान अन्तिम चरणमा पुगेको छ। यसैगरी कमल गाउँपालिका वडा नम्बर ५ (सिम्ले), वडा नम्बर २ (देवी चउण र ज्योतिनगर), तथा वडा नम्बर ६ (मैनाखता र मङ्गलबारे) मा समूहगत भेटघाट सकिएको छ।
गौरादह नगरपालिका भूगोलका आधारमा प्रत्येक घरमा पुग्ने गरी सबै वडामा टोलीहरू परिचालन गरिएका छन्। यहाँका सबै वडाहरूमा पनि घरदैलो अभियान अन्तिम चरणमा पुगेको छ।
दमकका विभिन्न टोलमा केन्द्रीय कमिटीदेखि टोल कमिटीसम्मका पदाधिकारी, सदस्य र शुभचिन्तकहरू उत्साहजनक रूपमा परिचालन भएको एमालेले जनाएको छ।
के छ ओलीको पत्रमा?
अध्यक्ष ओलीले मतदातालाई पठाएको पत्रमा फागुन २१ गतेलाई नेपाली जनताको ‘भाग्य र भविष्य निर्माण गर्ने महत्वपूर्ण दिन’ का रूपमा चित्रण गरिएको छ। पत्रमा देशको वर्तमान अवस्थाप्रति चिन्ता व्यक्त गर्दै निम्न मुख्य बुँदाहरू समेटिएका छन्:
“हाम्रो समाज र परिवारभित्रै विभाजन ल्याउने प्रयास भइरहेको छ, जसले अभिभावक र सन्तानबीचको सम्बन्धमा समेत सङ्कट निम्त्याउँदैछ। परिवार र समाज कमजोर भए देश नै कमजोर हुने भएकाले राष्ट्र निर्माणका लागि एमालेलाई मतदान गर्न आह्वान गर्दछु।”
मुलुक गम्भीर सङ्कटमा रहेको उल्लेख गर्दै ओलीले सामाजिक र पारिवारिक एकतामाथि भइरहेको प्रहारप्रति मतदातालाई सचेत गराएका छन्।
एमालेले ठूला आमसभाभन्दा पनि घरदैलो र व्यक्तिगत भेटघाटलाई नै मुख्य चुनावी हतियार बनाएको छ। पहिलो चरणको घरदैलो सकिएलगत्तै पार्टीको अर्को रणनीतिक योजनाअनुसार सङ्गठन परिचालन गर्ने तयारी गरिएको निर्वाचन परिचालन समितिले जनाएको छ।
