काठमाडौँ । त्रिभुवन अन्तर्राष्ट्रिय विमानस्थलबाट टर्कीको इस्तानबुलका लागि उडेको टर्किस एयरलाइन्सको यात्रुवाहक जहाजको इन्जिनमा आगलागी भएपछि भारतको कोलकातामा आकस्मिक अवतरण गरिएको छ।
२२५ यात्रु सवार उक्त जहाज हाल सुरक्षित अवस्थामा रहेको विमानस्थल प्रशासनले जनाएको छ। त्रिभुवन अन्तर्राष्ट्रिय विमानस्थलका महाप्रबन्धक टेकनाथ सिटौलाका अनुसार उडान नम्बर टीएचवाई ७२७ (ए३३०–३०३ सिरिज) को जहाजले बुधबार दिउँसो १ बजेर २८ मिनेटमा उडान भरेको करिब चार मिनेटमै दायाँ इन्जिनमा आगलागी देखिएको थियो।
इन्जिनमा आगो देखिएलगत्तै क्याप्टेनले विमानस्थललाई जानकारी गराएका थिए। त्यसपछि चालकदलले तत्काल दायाँ इन्जिन बन्द गरी जहाजलाई पश्चिम दिशामा करिब १० देखि १२ मिनेटसम्म होल्ड गरेका थिए।
आगलागीको खबर प्राप्त भएपछि त्रिभुवन अन्तर्राष्ट्रिय विमानस्थललाई करिब १५ मिनेटका लागि पूर्ण रूपमा बन्द गर्दै दमकल, एम्बुलेन्स र सुरक्षा टोलीलाई उच्च सतर्कतामा राखिएको थियो।
विमानस्थल प्रशासनले काठमाडौँमै आकस्मिक अवतरणको तयारी गरे पनि चालकदलले यात्रुको सुरक्षालाई मध्यनजर गर्दै जहाजलाई भारतको कोलकाता डाइभर्ट गर्ने निर्णय गरेपछि सोहीअनुसार अनुमति दिइएको जनाइएको छ।
जहाजले बाँया इन्जिनको मात्र सहयोगमा कोलकातामा सुरक्षित अवतरण गरेको छ। सबै यात्रु र चालकदल सुरक्षित रहेको पुष्टि गरिएको छ।
जहाज कोलकाता अवतरण गरेसँगै त्रिभुवन अन्तर्राष्ट्रिय विमानस्थलको उडान तथा अवतरण सेवा पुनः सामान्य अवस्थामा फर्किएको छ। इन्जिनमा आगलागी हुनुको कारणबारे प्राविधिक टोलीद्वारा विस्तृत अनुसन्धान गरिने विमानस्थल प्रशासनले जनाएको छ।
