वीरगन्ज । निर्वाचनको सरगर्मीसँगै नेपालको राजनीतिमा नयाँ मोड आएको छ। आगामी फागुन २१ का लागि तय भएको प्रतिनिधिसभा निर्वाचनमा उम्मेदवारी दिन बहालवाला मन्त्रीहरूले धमाधम राजीनामा दिएपछि धेरै मन्त्रालयहरू नेतृत्वविहीन बनेका छन्।
प्रमुख मन्त्रीहरूको बहिर्गमन निर्वाचन आयोगले उम्मेदवारी दर्ताका लागि माघ ६ गते मंगलबारको समय तोकेसँगै मन्त्रीहरूले पदबाट राजीनामा दिएका हुन्। यसरी राजीनामा दिनेहरूमा सञ्चार तथा सूचना प्रविधि मन्त्री जगदीश खरेल, ऊर्जा मन्त्री कुलमान घिसिङ र युवा तथा खेलकुद मन्त्री बब्लु गुप्ता रहेका छन्। पछिल्लो पटक शिक्षा, विज्ञान तथा प्रविधि मन्त्री महावीर पुनले पनि आफ्नो पदबाट राजीनामा बुझाएका छन्।
मन्त्रालयको जिम्मेवारी प्रधानमन्त्रीलाई एकैपटक धेरै मन्त्रीहरूले राजीनामा दिएपछि ती मन्त्रालयहरू हाल खाली भएका छन्। प्रधानमन्त्री सुशीला कार्कीले ती मन्त्रालयहरूको कार्यभार तत्कालका लागि आफैँले सम्हाल्ने गरी जिम्मेवारी तोकेकी छन्। निर्वाचन आचारसंहिता र कानुनी प्रावधानका कारण लाभको पदमा बसेर चुनाव लड्न नपाइने भएपछि मन्त्रीहरूले मैदान खाली गरेका हुन्।
प्रशासनिक अन्योलको जोखिम महत्वपूर्ण मन्त्रालयहरू मन्त्रीविहीन हुँदा दैनिक प्रशासनिक काम र नीतिगत निर्णयहरूमा असर पर्न सक्ने देखिएको छ। विशेषगरी सञ्चार, ऊर्जा र शिक्षा जस्ता संवेदनशील क्षेत्रमा नेतृत्व नहुँदा कर्मचारीतन्त्रमा समेत केही अन्योल छाएको छ।
प्रधानमन्त्री सचिवालयका अनुसार चुनावसम्मका लागि नयाँ मन्त्री नियुक्त गर्ने सम्भावना न्यून छ, जसले गर्दा बाँकी रहेका मन्त्रीहरूलाई थप मन्त्रालयको जिम्मेवारी दिने वा प्रधानमन्त्रीकै मातहतमा राख्ने तयारी भइरहेको छ।
