फोहरमैला प्रशोधन केन्द्रमा तीन जनाको हत्या, एक जना पक्राउ

काठमाडौँ । तनहुँको शुक्लागण्डकी नगरपालिका–५ बेलचौतारा कसेरीघाटस्थित फोहरमैला प्रशोधन केन्द्रमा तीन जनाको हत्या भएको घटनामा एक जना पक्राउ परेका छन् । गत शनिबार सो स्थानमा तीन जना मृतावस्थामा फेला परेका थिए ।

जिल्ला प्रहरी कार्यालय तनहुँका प्रहरी उपरीक्षक टेकबहादुर कार्कीका अनुसार मंगलबार एक जनालाई पक्राउ गरिएको हो । पक्राउ परेका व्यक्तिले हत्या स्वीकार गरेको र घटनाबारे थप अनुसन्धान भइरहेको प्रहरीले जनाएको छ । ती व्यक्ति नियमित रूपमा फोहरमैला प्रशोधन केन्द्र जाने गरेको बताइएको छ ।

मृतकहरूमा शुक्लागण्डकी नगरपालिका–११ का ४१ वर्षीय नारायण विक र भिमाद नगरपालिका–८ भागरकी ५८ वर्षीया देउमाया थापाको पहिचान खुलेको छ । अर्का एक जनाको पहिचान भने अझै खुल्न बाँकी रहेको प्रहरीले जनाएको छ ।