वीरगन्ज । स्वास्थ्य तथा जनसंख्यामन्त्री डा. सुधा गौतम शर्माले सोमबार नारायणी अस्पतालको आकस्मिक स्थलगत अनुगमन गरेकी छिन् । अनुगमनका क्रममा उनले आकस्मिक कक्ष, मेडिकल वार्ड, सर्जिकल वार्ड, आईसीयू वार्ड लगायतका विभिन्न वार्डहरुको निरीक्षण गर्दै अस्पतालको सेवा प्रवाह र वस्तुस्थिति बारे विस्तृत जानकारी लिईन् ।
अनुगमनका क्रममा अस्पतालको जीर्ण अवस्था र स्रोतसाधनको उपयोगमा समेत प्रश्न गरेकी थिईन् । स्थलगत अनुगमन पश्चात् अस्पतालको सभाहलमा आयोजित अनौपचारिक कार्यक्रममा मेसु डा.चितरन्जन साहले मन्त्री समक्ष अस्पतालको सेवा प्रवाह सम्बन्धी विस्तृत जानकारी गराएपछि ।
बोल्दै स्वास्थ्य तथा जनसंख्यामन्त्री डा.शर्माले नारायणी अस्पताल विगतको तुलनामा हाल जीर्ण अवस्थामा पुगेकोमा चिन्ता व्यक्त गरिन् । उनले नेपाल सरकारले स्वास्थ्य क्षेत्रलाई उच्च प्राथमिकतामा राखेको उल्लेख गर्दै, पर्सा जिल्लाको नारायणी अस्पतालमा स्रोतसाधन हुँदाहुँदै पनि स्वास्थ्य क्षेत्रमा किन पछि परेको भन्दै यसको बारेमा सबैपक्षले सोच्नुपर्ने धारणा व्यक्त गरिन् ।
मन्त्री शर्माले नारायणी अस्पताल संघीय सरकारको लागि उच्च प्राथमिकतामा रहेको स्पष्ट पार्नुभयो र अस्पतालको सुधारका लागि निम्न प्रतिबद्धताहरू व्यक्त गरेकी छिन् । अस्पतालमा नर्सहरुको संख्या बढाउन पहल गरिने, अस्पतालको भवन निर्माणमा भइरहेको समस्यालाई बुझेर भवन विभागसँग समन्वय गरी समाधान गरिने आश्वासन दिएकी छिन् ।
त्यस्तै अस्पतालको नयाँ भवन निर्माणका लागि वातावरणीय प्रभाव मूल्याङ्कनको प्रक्रिया अगाडि बढाई बजेटमा पार्ने सुनिश्चितता गरिने पनि बताईन् । दरबन्दी हुँदाहुँदै पनि स्वास्थ्यकर्मीहरु आउन नमान्ने समस्यालाई समाधान गर्न उनीहरुलाई काम गर्ने उपयुक्त वातावरण सबैले मिलेर बनाउनुपर्नेमा जोड दिएकी थिईन् ।
अनुगमनमा अस्पतालका मेडिकल सुपरिटेन्डेन्ट (मेसु) डा. चितरन्जन साह, प्रमुख जिल्ला अधिकारी भोला दाहाल, राष्ट्रिय अनुसन्धान पर्साका उपअनुसन्धान निर्देशक संतोष दाहाल, जिल्ला प्रहरी कार्यालय पर्साका प्रहरी नायव उपरीक्षक हरि बहादुर बस्नेत, अस्पताल विकास समितिका अध्यक्ष धीरज गुप्ता, डा. नीरज सिंह, डा.सुरेन्द्र चौधरी लगायत विभिन्न सरोकारवालाहरुको उपस्थिति रहेको थियो ।
