रंजीत पाण्डेय
बारा । बाराको परवानीपुरमा भएको सवारी दुर्घटनामा एक वृद्ध पुरुषको घटनास्थलमै मृत्यु भएको छ।
बुधबार राति १०ः३० बजे बारा जिल्लाको परवानीपुर गाउँपालिका–२ मुसहरी स्थित सडक खण्डमा रामपुर टोकनीबाट लिपनीतर्फ जाँदै गरेको ना.१ ज ७३७३ नम्बरको टाटा सुमोले पैदल यात्रुलाई ठक्कर दिँदा ६५ वर्षीय गौरीशंकर साहको घटनास्थलमै मृत्यु भएको जिल्ला प्रहरी कार्यालय बाराले जनाएको छ।
दुर्घटनापछि सुमो गाडी नजिकैको बिजुलीको पोलमा ठोक्किँदा पोल समेत भाँचिएको र सुमो घटना स्थलमै रहेको प्रहरीले जनाएको छ।
घटनाको जानकारी पाएलगत्तै इलाका प्रहरी कार्यालय प्रसौनी, बाराबाट प्रहरी नायब निरीक्षक दिपक कुमार बस्नेतको कमाण्डमा टोली खटिएको थियो।
सोही क्रममा सुमो चालक प्रसौनी गाउँपालिका–७, बलुवा, बाराका २२ वर्षीय राजन साह कानुलाई नियन्त्रणमा लिइएको छ।
यसैगरी, इलाका प्रहरी कार्यालय प्रसौनी, बाराबाट प्रहरी निरीक्षक टुपेन्द्र श्रेष्ठको कमाण्डमा मुचुल्का संकलनका लागि थप टोली खटाइएको प्रहरीले जानकारी दिएको छ।
प्रहरीका अनुसार बुधबार राति १०ः४५ बजे शव मुचुल्का प्रक्रिया पूरा गरी पोष्टमार्टमका लागि प्रादेशिक अस्पताल कलैया, बारामा पठाइएको छ। टाटा सुमो गाडी समेत प्रहरीले नियन्त्रणमा लिएको जनाएको छ।
