वीरगन्ज । वीरगञ्जमा सर्वसाधारणलाई डरत्रास देखाउँदै हिँडिरहेका एक व्यक्तिलाई कटुवा पेस्तोलसहित प्रहरीले पक्राउ गरेको छ।
विशेष सूचनाका आधारमा वडा प्रहरी कार्यालय विर्ताका प्रहरी निरीक्षक निरोज चौलागाईको नेतृत्वमा खटिएको प्रहरी टोलीले वीरगञ्ज महानगरपालिका वडा नं.– १६ इनर्वागाउँस्थित मस्जिद नजिकबाट शंकास्पद व्यक्तिलाई नियन्त्रणमा लिएको हो।
पक्राउ पर्नेमा पर्साको बिन्दवासिनी गाउँपालिका वडा नं. ५ प्रसौनीभठ्ठा घर भई हाल वीरगञ्ज महानगरपालिका वडा नं.–१६ इनर्वागाउँस्थित ससुरालीमा बस्दै आएका ४० वर्षीय साहेव खाँ रहेका छन्। उनको खानतलासी गर्दा एक थान कटुवा पेस्तोल फेला परेको पर्सा प्रहरीका प्रवक्ता प्रहरी नायव उपरीक्षक किशोर लम्सालले जानकारी दिए ।
बरामद पेस्तोलसहित खाँलाई नियन्त्रणमा लिई हातहतियारसम्बन्धी कसूरमा थप अनुसन्धानका लागि पर्सा जिल्ला अदालतबाट सात दिनको म्याद थप गरिएको प्रहरी नायव उपरीक्षक लम्सालले बताए ।
