वीरगन्ज । गतबर्षको माध्यामिक शिक्षा परीक्षा ‘एसईई’ मा अपेक्षित अंक नपाएका गौतम माविका दुई विद्यार्थीहरु पुर्नयोग मूल्यांकनपछि नेपालकै उत्कृष्ट विद्यार्थी भएका छन् ।
गौतम माविका आरभ कुमार सिंह तथा कुमारी आयुषी चौरसिया कम्प्युटर विज्ञान विषयको पुनःजाँच तथा पुर्नयोग प्रक्रिया पश्चात् ४ जीपीए प्राप्त गरी नेपाल टपर बन्न सफल भएको गौतम माविले जनाएको छ ।
यो ऐतिहासिक उपलब्धिका लागि विद्यालय परिवारले उत्तीर्ण विद्यार्थीहरुलाई हार्दिक बधाई तथा शुभकामना व्यक्त गरेको छ ।
विद्यार्थीहरुको वर्षौंको कठोर परिश्रम, अनिद्राका रातहरू र अटल निष्ठाको प्रतिफल स्वरूप ४ जिपिए हासिल गरेपछि गौतम माध्यमिक विद्यालय परिसरमा खुसीको आँसु र गौरवको अभूतपूर्व उत्सव छाएको छ ।
राष्ट्रकै सर्वोत्कृष्ट नतिजा हासिल गर्दै नेपाल टपर बन्न सफल विद्यार्थीद्वय आरव कुमार सिंह र आयुषी चौरसियाको यो सफलता केवल एउटा नतिजा मात्र नभई उनीहरुले आफ्नो क्षमताप्रतिको आत्मविश्वास, धैर्य, सङ्घर्ष र सत्यको विजयको एउटा अविस्मरणीय कथा बनेको छ ।
एसईई परीक्षाको नतिजा सार्वजनिक भएपछि कम्प्युटर विज्ञान विषयको प्रारम्भिक नतिजा आउँदा अपेक्षित अंक नआएर मनमा लागेको ठेस, नसोचेको अङ्क देख्दा छाएको स्तब्धता र त्यसपछि सिर्जना भएको मानसिक तथा भावनात्मक पीडालाई चिर्दै उनीहरूले पुनःजाँच र पुनःमूल्याङ्कनका लागि निवेदन दिएका थिए ।
आफ्नै मेहनत र क्षमतामाथि अटल विश्वास राखेर गरिएको त्यो हिम्मतले अन्ततः न्याय पाएका छन्। उत्तरपुस्तिका पुनःजाँचपश्चात् दुवै जनाले पूर्ण ४ जिपिए हासिल गर्दै सफलताको शिखर चुमेका छन्।
सन्तानको सफलतामा आफ्ना सपना साट्ने अभिभावकहरूको त्याग र निरन्तरको प्रोत्साहन, अनि शिक्षकवर्गहरूको समर्पण बिना यो ऐतिहासिक उपलब्धि सम्भव थिएन।
तर गौतम माविका विद्यार्थीहरुमाथि भएको छलकपटपूर्ण व्यावहारलाई भने उनीहरुले गरेको परिश्रम र लगनशिलताले एउटा गतिलो जवाफ दिएको छ ।
यसबाट परीक्षा बोर्ड र सम्बन्धित निकायलाई एउटा गम्भीर सन्देश के दिएको छ भने, उत्तरपुस्तिका परीक्षणमा हुने एउटा सानो असावधानीले विद्यार्थीहरुको आत्मविश्वास र मेहेनतमाथि कति ठूलो चोट पुर्याउन सक्छ ? निष्पक्ष र पारदर्शी मूल्याङ्कन प्रत्येक विद्यार्थीको नैसर्गिक अधिकार हो भन्ने कुरालाई यो नतिजाले पुनः पुष्टि गरेको छ।
अन्ततः, सबै शङ्का र पीडाहरूलाई जित्दै आरव र आयुषीले गौतम माध्यमिक विद्यालय, आफ्ना अभिभावक र सम्पूर्ण देशकै शिर उच्च बनाएका छन्।
असावधानीले निम्त्याएको निराशाको आँसुलाई खुसीमा बदलेको यो ऐतिहासिक क्षणको साक्षी बन्न पाउनु सम्पूर्ण गौतम मावि परिवारका लागि ठूलो भाग्यको कुरा रहेको विद्यालय परिवारको भनाई छ ।
