वीरगन्ज । वीरगञ्जको मिर्ली चोक निवासी एक शारीरिक रूपमा अशक्त व्यक्तिलाई घरमै पुगेर ह्विलचेयर सहयोग प्रदान गरिएको छ। उपकार सेवा नेपाल र क्विन ज्वेलर्सको सम्पूर्ण समन्वय तथा सहयोगमा वीरगञ्ज महानगरपालिका वडा नम्बर ११ का ५५ वर्षीय लालबाबु नेपालीलाई सो सहयोग उपलब्ध गराइएको हो।
विगत दुई वर्षदेखि ओछ्यानमै थलिएका नेपालीको हातखुट्टाले काम गर्न छाडेपछि उनी पूर्ण रूपमा हिँडडुल गर्न नसक्ने अवस्थामा थिए । परिवारका सदस्यहरूले निकै कष्टपूर्ण रूपमा उनको हेरचाह गरिरहेको जानकारी पाएपछि संस्थाका प्रतिनिधिहरू उनकै निवासमा पुगेर ह्विल चेयर वितरण गरेका हुन्।
शारीरिक अस्वस्थताका कारण कष्टकर जीवन बिताइरहेका नेपालीलाई आवतजावतमा सहज होस् भन्ने उद्देश्यले यो मानवीय सहयोग गरिएको संस्थाले जनाएको छ। उपकार सेवा नेपालले यसअघि पनि दुर्गम क्षेत्रका असहाय तथा निसहाय व्यक्तिहरूलाई उनीहरूको आवश्यकता अनुसार विभिन्न सहयोग उपलब्ध गराउँदै आएको छ।
ह्विलचेयर हस्तान्तरण कार्यक्रममा उपकार सेवा नेपालकी अध्यक्ष विद्या कुमारी सरावगी, वडा नम्बर ११ का वडा अध्यक्ष अजय चौरसिया, सामाजिक अभियन्ता प्रकाश थारु, समाजसेवीहरू अमर सर्राफ, प्रज्वलमान डंगोल र दिप्पु वर्णवाल लगायत स्थानीय भद्रभलादमीहरूको उपस्थिति रहेको थियो।
