वीरगन्ज । सशस्त्र प्रहरी बल नेपाल पर्साले स्रोत नखुलेको नगद रुपैंया सहित एकजनालाई पक्राउ गरेको छ । पर्सा जिल्लाको वीरगञ्ज महानगरपालिका १६ स्थित भन्सार मेनगेटबाट सशस्त्र प्रहरीले स्रोत नखुलेको २० लाख रुपैयाँभन्दा बढी नगद सहित एक जनालाई नियन्त्रणमा लिएको हो।
विशेष सूचनाको आधारमा सशस्त्र प्रहरी बल नेपाल सीमा सुरक्षा गुल्म हेडक्वार्टर वीरगञ्जबाट खटिएको चेकप्वाइन्ट टोलीले भारतबाट नेपालतर्फ आउँदै गरेको बीआर ०५ बीके ८६०३ नम्बरको मोटरसाइकललाई जाँच गर्ने क्रममा उक्त रकम बरामद गरेको हो। पक्राउ पर्नेमा वीरगञ्ज महानगरपालिका १७ अलौ बस्ने ५० वर्षीय विनय शंकर साह तुरहा रहेका छन्।
सशस्त्र प्रहरीका अनुसार निजले मोटरसाइकलको सिट कभरमुनि प्लास्टिकमा प्याक गरी लुकाईछिपाई ल्याउँदै गरेको अवस्थामा नेपाली एक हजार दरका १३ सय २ थान, पाँच सय दरका १४ सय थान र ५० रुपैयाँको एक थान गरी जम्मा २० लाख २ हजार ५० रुपैयाँ फेला परेको सशस्त्र प्रहरी बल नेपाल नम्बर १३ गण हेडक्वाटर पर्साका सूचना अधिकारी सशस्त्र प्रहरी नायव उपरीक्षक मोहन निरौलाले जानकारी दिए ।
यसका साथै निजको साथबाट भारतीय १०० रुपैयाँका ६ थान नोट, सामसुङ ग्यालेक्सी ए१५ मोबाइल र वीरगञ्ज भन्सार एजेन्ट संघ पर्साको परिचय पत्र समेत बरामद गरिएको सूचना अधिकारी सशस्त्र प्रहरी नायब उपरीक्षक निरौलाले बताए ।
पक्राउ परेका व्यक्ति, बरामद गरिएको नगद, मोटरसाइकल र अन्य सामग्री आवश्यक कारबाहीका लागि वीरगञ्ज भन्सार कार्यालय पर्सामा बुझाइएको सशस्त्र प्रहरी बल नेपाल नम्बर १३ गण हेडक्वार्टर पर्साले जनाएको छ।
