काठमाडौं । नेपालमा सञ्चालित विभिन्न ११ वटा स्वदेशी उद्योग तथा कम्पनीहरूले विश्वप्रसिद्ध बहुराष्ट्रिय ब्रान्डहरूको ट्रेडमार्क चोरी गरेको आरोप लागेपछि उद्योग विभागले कठोर कदम चालेको छ।
कोकाकोला, जुम र ह्युगो बोस जस्ता प्रतिष्ठित अन्तर्राष्ट्रिय कम्पनीहरूले आफ्नो व्यापारिक चिन्ह अनाधिकृत रूपमा प्रयोग भएको भन्दै उजुरी दिएपछि विभागले आरोपित कम्पनीहरूसँग लिखित स्पष्टीकरण माग गरेको हो।
यसअघि विभागले पठाएको म्याद सूचनालाई बेवास्ता गरी कुनै पनि जवाफ नफर्काएका ती उद्योगहरूलाई अहिले सार्वजनिक सूचनामार्फत नै सात दिनभित्र सप्रमाण उपस्थित हुन अन्तिम अल्टिमेटम दिइएको छ।
विभागका अनुसार संक्षिप्त कार्यविधि ऐन, २०२८ बमोजिम उजुरीको प्रतिलिपि पठाइए पनि हालसम्म ती कम्पनीहरूबाट कुनै प्रतिक्रिया प्राप्त भएको छैन। सूचना प्रकाशित भएको मितिले बाटोको म्यादबाहेक सात दिनभित्र कानुन शाखामा लिखित जवाफ पेस नगरेमा विभागले कानुन बमोजिम एकतर्फी कारबाही अगाडि बढाउने चेतावनी दिएको छ।
सार्वजनिक गरिएको सूचीमा रहेका सबै ११ वटै उजुरीहरू ट्रेडमार्क दाबी विरोधसँग सम्बन्धित छन्, जसमा अन्तर्राष्ट्रिय ब्रान्डको हुबहु नक्कल गरिएको वा नाम जोडिएको दाबी गरिएको छ।
विशेष गरी अमेरिकी कम्पनी द कोकाकोलाले सुनसरीको प्रिमियर अर्गान्स विरुद्ध ‘पलपल कोला’ र पाथिभरा फुड एन्ड प्याकेजिङ विरुद्ध ‘कुल कोला’ एवं ‘सुपर फ्यान्टास्टिक’ उत्पादनमा उजुरी दिएको छ।
त्यस्तै, भिडियो कलिङ एप जुमले झापाको कविश मार्केटिङको कस्मेटिक्स उत्पादनमाथि र जर्मनीको ह्युगो बोसले झापाकै इमानुर फेसन वेयरले प्रयोग गरेको ‘बास’ ट्रेडमार्कमाथि दाबी गरेको छ। यसैगरी टर्नर इन्टरटेनमेन्टले चितवनको नौलो फुड्स र भक्तपुरको पवित्रा लक्ष्मी फुडका उत्पादनहरू विरुद्ध उजुरी हालेका छन्।
रुपन्देहीको एक्वा नेपाल बिसलेरी र काठमाडौंको मनोहरा फुड एन्ड बेभरेजलाई पनि इनर्जी ब्रान्ड्स अमेरिकाले ट्रेडमार्क चोरीमा उजुरी दिएको छ।
न्युजिल्यान्डको काठमाडौं लिमिटेड र अमेरिकाको ट्रेक बाइसाइकलले पनि क्रमशः ओम मंगलाकाली टेक्सटाइल र वीरगञ्जको टर्बो ट्रेक विरुद्ध कानुनी उपचार खोजेका छन्।
नेपालमा पछिल्लो समय विदेशी स्थापित ब्रान्डसँग मिल्दोजुल्दो नाम राखेर स्थानीय स्तरमा वस्तु उत्पादन गर्ने प्रवृत्ति बढ्दै गएको सन्दर्भमा विभागको यो सक्रियताले बौद्धिक सम्पत्ति संरक्षणमा कडाइ हुने भएको छ।
