वीरगन्ज – औद्योगिक प्रतिष्ठानमा गुनासो व्यवस्थापन संयन्त्र सञ्चालनका लागि वीरगन्जमा एक दिने क्षमता अभिवृद्धि तालिम सम्पन्न भएको छ । युरोपियन युनियनको आर्थिक सहयोग, अन्तर्राष्ट्रिय श्रम संगठन (आईएलओ) र नेपाल उद्योग वाणिज्य महासंघको सहकार्यमा ‘सशक्त महिला, समृद्ध नेपाल’ कार्यक्रम अन्तर्गत यो तालिम आयोजना गरिएको हो ।
कार्यक्रममा वीरगंज उद्योग वाणिज्य संघका अध्यक्ष हरि गौतमले कार्यस्थललाई सुरक्षित, मर्यादित र समानतामूलक बनाउन औद्योगिक प्रतिष्ठान स्तरको गुनासो व्यवस्थापन संयन्त्र अत्यन्त उपयोगी हुने बताए ।
उनले उद्योगमा कार्यरत श्रमिकहरूको अधिकार संरक्षण र कार्यस्थलका समस्या समाधान गर्न यस्तो संयन्त्रले पुलको काम गर्ने धारणा राखे ।
नेपाल उद्योग वाणिज्य महासंघका सहायक निर्देशक हरि पौडेलले कार्यक्रमको उद्देश्यबारे प्रकाश पार्दै युरोपियन युनियनको आर्थिक सहयोगमा अन्तराष्ट्रिय श्रम संगठन र नेपाल उद्योग वाणिज्य महासंघको सहयर्कायमा महिलाहरुलाई सशक्त बनाएर उद्योग व्यावसाय क्षेत्रमा अधिकतम सहभागिता गराई अर्थतन्त्रमा योगदान पु¥याउने उद्देश्यले परियोजना सञ्चालनमा ल्याएको बताए ।
मधेश प्रदेशका पाँच वटा उद्योगमा गठित संयन्त्रका सदस्यहरूलाई लक्षित गरी यो प्रयोगात्मक तालिम सञ्चालन गरिएको जानकारी ‘सशक्त महिला, समृद्ध नेपाल’ कार्यक्रमका मधेस प्रदेश संयोजक डा. वासुदेव लाल कर्णले जानकारी दिए । विशेषगरी कार्यस्थलमा हुन सक्ने यौनजन्य हिंसा तथा दुर्व्यवहारलाई सम्बोधन गर्ने विधिबारे तालिम केन्द्रित रहेको उनको भनाई छ ।
प्रशिक्षक अधिवक्ता शर्मिला श्रेष्ठले सहभागीहरूलाई लैङ्गिक हिंसा न्यूनीकरण, सुरक्षित कार्य वातावरण निर्माण र विद्यमान निर्देशिका अनुसार गुनासो व्यवस्थापन गर्ने प्रक्रियाबारे प्रशिक्षण दिएकी थिईन् ।
तालिममा विभिन्न औद्योगिक प्रतिष्ठानका प्रतिनिधि र गुनासो सुनुवाइ समितिका सदस्यहरूको सहभागिता रहेको ‘सशक्त महिला, समृद्ध नेपाल’ को सहायता कक्षकी सहजकर्ता अन्जु राना मगरले जानकारी दिईन् ।
