वीरगञ्ज । आगामी फागुन २१ गते हुने प्रतिनिधिसभा सदस्य निर्वाचनका लागि पर्सा जिल्ला सुरक्षा समितिले आफ्नो तयारीलाई अन्तिम चरणमा पुर्याएको छ। जिल्लाका कुल १६७ मतदानस्थलमध्ये १६५ वटाको अनुगमन र निरीक्षण कार्य सम्पन्न भएको छ।
प्रमुख जिल्ला अधिकारी भोला दाहालको नेतृत्वमा चारवटै सुरक्षा निकायले जिल्लाका अधिकांश मतदानस्थलको स्थलगत अवलोकन गरी सुरक्षा रणनीति तय गरेका छन्। सुरक्षा समितिले ६२ मतदानस्थललाई ‘अतिसंवेदनशील’, ८५ लाई ‘संवेदनशील’ र २० लाई ‘कम संवेदनशील’ सूचीमा राखेर सुरक्षाकर्मी परिचालन गर्ने योजना बनाएको छ। ३ लाख ७६ हजार ५१३ मतदाता रहेको पर्सामा ४४१ स्थायी र २ अस्थायी मतदान केन्द्रहरू तोकिएका छन्।
प्रजिअ दाहालले बाँकी रहेका दुई मतदानस्थलको पनि छिट्टै निरीक्षण गरिने र जिल्लाभर भयरहित वातावरणमा मतदान सम्पन्न गराउन प्रशासन प्रतिबद्ध रहेको बताउनुभएको छ।
