वीरगञ्ज । सशस्त्र प्रहरी बल नेपाल नम्बर १३ गण हेडक्वाटर पर्सामा सरुवा भएर आएका सशस्त्र प्रहरी उपरीक्षक मोहन बहादुर क्षेत्रीलाई वीरगन्ज उद्योग वाणिज्य संघले स्वागत गरेको छ ।
वीरगञ्ज उद्योग वाणिज्य सङ्घका अध्यक्ष हरिप्रसाद गौतमको अध्यक्षतामा नवआगन्तुक सशस्त्र प्रहरी उपरीक्षक क्षेत्रीसँग विशेष भेटघाट तथा छलफल गरेको हो ।
सङ्घको सभाहलमा आयोजित कार्यक्रममा सीमा सुरक्षा, अवैध व्यापार नियन्त्रण र औद्योगिक सुरक्षाका विषयमा गहन छलफल भएको थियो।
कार्यक्रम अध्यक्ष हरिप्रसाद गौतमले नवआगन्तुक सशस्त्र प्रहरी उपरीक्षक क्षेत्रीलाई वीरगञ्जमा हार्दिक स्वागत गर्दै पर्सा जिल्लाको शान्ति सुरक्षा कायम गर्न र सीमा क्षेत्रमा हुने अवैध व्यापारिक गतिविधि नियन्त्रणमा सशस्त्र प्रहरीले खेल्दै आएको भूमिकालाई अझ सशक्त हुने अपेक्षा गरे ।
आगामी दिनमा सङ्घ र सुरक्षा निकायबीच अझ बढी सुमधुर, समन्वयकारी र प्रभावकारी सम्बन्ध रहने विश्वास समेत अध्यक्ष गौतमले व्यक्त गरे । छलफलका क्रममा उद्योगी व्यवसायीहरूले भोग्नुपरिरहेका सुरक्षा चुनौती र व्यावसायिक सहजताका लागि आवश्यक सहकार्यका बारेमा पनि चर्चा गरिएको थियो।
स्वागत तथा छलफल कार्यक्रममा संघका निवर्तमान अध्यक्ष अनिल कुमार अग्रवाल, बरिष्ठ उपाध्यक्ष माधव राजपाल, उपाध्यक्ष, आशिष कुमार लाठ, महासचिव शिवजीप्रसाद, कोषाध्यक्ष अनोज रुङ्गटा, सहसचिव प्रेमचन्द्र गोयल, सहकोषाध्यक्ष निरज अग्रवाल र सङ्घका कार्य समिति सदस्यहरूको उपस्थिति रहेको थियो ।
कार्यक्रमको अन्त्यमा सशस्त्र प्रहरी उपरीक्षक क्षेत्रीले उद्योगी व्यवसायीहरूको सुरक्षा र सीमा नाकामा हुने तस्करी नियन्त्रणका लागि प्रशासन प्रतिबद्ध रहेको बताउँदै सङ्घसँग निरन्तर संवादमा रहने प्रतिबद्धता जनाएका थिए ।
