वीरगन्ज । नेकपा एमालेको हालै सम्पन्न ११औँ राष्ट्रिय महाधिवेशनबाट पर्सा र बारा जिल्लाले केन्द्रीय नेतृत्वमा प्रभावशाली प्रतिनिधित्व पाएको छ। महाधिवेशनबाट पर्सा जिल्लाबाट तीनजना र बाराबाट आधा दर्जनभन्दा बढी नेताहरू केन्द्रीय सदस्य पदमा निर्वाचित भएका छन्।
पर्सा जिल्लाबाट केन्द्रीय सदस्यमा निर्वाचित हुनेहरूमा निर्मला देवकोटा, प्रभु हजरा र विजय सरावगी रहेका छन्। निर्वाचित तीनैजना नेताहरू लामो समयदेखि पर्साको राजनीतिमा सक्रिय र स्थापित अनुहार हुन्।
त्यसैगरी बारा जिल्लाबाट तत्कालीन प्रतिनिधिसभा सदस्य तथा पूर्वमन्त्री ज्वाला कुमारी साह र निर्वाचन क्षेत्र नं। १ का तत्कालीन सांसद अच्युत मैनाली केन्द्रीय सदस्यमा निर्वाचित भएका छन्। बाराकै अन्य निर्वाचित नेताहरूमा प्रतिनिधिसभा सदस्यद्वय किसान श्रेष्ठ र एकबाल मिया, संविधानसभा सदस्य बलबीर चौधरी तथा मधेस प्रदेशसभा सदस्य महम्मद समीर रहेका छन्।
यसपटक युवा पुस्ताको प्रतिनिधित्व गर्दै इन्जिनियर मोबिन आलम पनि केन्द्रीय सदस्य पदमा निर्वाचित भएका छन्। युवाहरूलाई संगठित गर्ने र नेतृत्व विकासमा सक्रिय रहँदै आएका आलमको आगमनले पार्टीमा नयाँ ऊर्जा थपिने कार्यकर्ताहरूको विश्वास छ।
मधेस प्रदेशको राजनीतिक केन्द्र मानिने यी दुई जिल्लाबाट यति ठूलो संख्यामा केन्द्रीय नेतृत्वमा प्रतिनिधित्व हुनुलाई स्थानीय स्तरमा गौरवको विषयका रूपमा हेरिएको छ।
निर्वाचित नेताहरूले पार्टीलाई वैचारिक रूपमा सुदृढ बनाउँदै जनमुखी कार्यक्रममार्फत समसामयिक चुनौतीहरूको सामना गर्ने प्रतिबद्धता व्यक्त गरेका छन्।
यस सफलतापछि जिल्लाका नेता, कार्यकर्ता तथा शुभेच्छुकहरूले निर्वाचित सदस्यहरूलाई बधाई दिँदै उनीहरूको सफल कार्यकालको शुभकामना व्यक्त गरिरहेका छन्।
