वीरगञ्ज। जिल्ला प्रशासन कार्यालय, पर्साले सीमावर्ती नाकाबाट जिल्लामा अपरिचित व्यक्ति तथा समुदायहरू प्रवेश गर्न सक्ने भन्दै उच्च सतर्कता अपनाउन सर्वसाधारणलाई अनुरोध गरेको छ। जिल्ला सुरक्षा समितिको निर्णयअनुसार सीमा क्षेत्रमा सुरक्षा निकायबाट चेकजाँचमा कडाइ गरिएको जानकारी गराउँदै प्रशासनले त्यस्ता शङ्कास्पद व्यक्तिबारे जानकारी भए नजिकको सुरक्षा निकायमा तत्काल खबर गर्न आग्रह गरेको छ।
सहायक प्रमुख जिल्ला अधिकारी विनोष कुमार पोखरेलले जारी गरेको सूचनामा भनिएको छ, ‘हाल सीमावर्ती नाकाबाट शंकास्पद व्यक्तिहरु जिल्लामा प्रवेश गर्न सक्ने हुनाले सीमावर्ती क्षेत्रमा सुरक्षा निकायबाट चेकजाँचमा कडाइ गरिएको व्यहोरा जानकारी गराउँदै कोही अपरिचित व्यक्ति वा समुदायहरू जिल्लाभित्र प्रवेश गरेको अवस्थामा त्यस्ता व्यक्तिरसमुदायहरूको सम्बन्धमा नजिकको सुरक्षा निकायहरूमा जानकारी गराउनु हुन अनुरोध छ।’
प्रशासनले सुरक्षा संवेदनशीलतालाई मध्यनजर गर्दै कुनै पनि परिचय नखुलेका अपरिचित व्यक्ति वा समुदायलाई आफ्नो घरमा वसोवास गर्न नदिन र कुनै पनि कामकाजमा नलगाउन समेत आम सर्वसाधारणमा अनुरोध गरेको छ।
यो कदम जिल्लाको शान्ति सुरक्षा तथा अमनचयन कायम राख्नका लागि चालिएको र यसमा सबै नागरिकको सहयोग अपरिहार्य रहेको जिल्ला प्रशासन कार्यालयले जनाएको छ।
