वीरगन्ज । सुशीला कार्की नेतृत्वको नागरिक सरकारले तोकेको आगामी फागुन २१ गतेको निर्वाचनका लागि सरकारको तर्फबाट थालिएको तयारीसँग राजनीतिक दलहरुले पनि आफ्नो गतिविधिहरुलाई बढाउन थालेको छ ।
सुशीला कार्की नेतृत्वको सरकार अवैधानिक रहेको भन्दै प्रतिनिधिसभा पुर्नस्थापना हुनुपर्ने माग पनि कायमै राखेर केपी शर्मा ओली नेतृत्वको नेकपा एमालले भने अहिले निर्वाचनको गतिविधिलाई पनि अगाडि बढाएको छ ।
प्रचण्ड र माधव कुमार नेतृत्वको दुवै कम्युनिष्ट पार्टी लगायत अन्य १६ दललाई समाहित गर्दै नेपाली कम्युनिष्ट पार्टी बनेपछि अहिले प्रदेशहरुमा ‘एकता सन्देशसभा’ आयोजना गर्दै आएको छ ।
रबि लामिछाने नेतृत्वको राष्ट्रिय स्वतन्त्र पार्टी (रास्वपा) ले पनि निर्वाचनका लागि समानुपातिकको बन्दसूचीका लागि उम्मेदवार नै आह्वान गरिसकेको छ ।
निर्वाचन हुने वा नहुने भन्ने अन्योलका बीच पनि पर्सामा प्रतिनिधिसभा निर्वाचनका सम्भावित उम्मेदवारहरुको चर्चा चल्न थालेको छ । सामाजिक सञ्जाल मार्फत आफ्ना निकटकाहरुलाई उम्मेदवारको रुपमा प्रस्तुत गर्नेदेखि पार्टीको तर्फबाट पनि संभावित उम्मेदवारहरुको चर्चा र छलफल बढ्न थालेको छ ।
कतिपयले आफैले पनि आगामी निर्वाचनका लागि उम्मेदवार घोषणा गरिसकेका छन् । प्रतिनिधिसभाको चारवटा निर्वाचन क्षेत्र रहेको पर्साको निर्वाचन क्षेत्र नम्बर १ बाट नेपाली कांग्रेसकोतर्फबाट संविधानसभा सदस्य तथा उद्योगी अनिल रुंगटाको नाम चर्चामा छ ।
त्यस्तै उपेन्द्र यादव नेतृत्वको जनता समाजवादी पार्टी नेपालले पनि महासचिव तथा हाल प्रदेशसभा (ख) का प्रदेश सांसद मोहम्मद लालबाबु राउत गद्दीलाई उम्मेदवार बनाउन सक्ने सम्भावना रहेको चर्चा छ ।
उनले प्रतिनिधिसभा निर्वाचनमा उम्मेदवार बन्नुपरेमा प्रदेशसभा सांसदबाट राजिनामा दिनुपर्ने हुन्छ । त्यस्तै प्रतिनिधिसभा निर्वाचनमा पर्सा क्षेत्र नम्बर १ मा राष्ट्रिय स्वतन्त्र पार्टी (रास्वपा) बाट पार्टीका जिल्ला सभापति हरि पन्त पनि उम्मेदवार बन्न सक्ने देखिएको छ ।
रास्वपाले समानुपातिक उम्मेदवारको बन्दसूचीका लागि नाम आह्वान गरेको छ । केन्द्रीय कार्यालयबाट विज्ञप्ति मार्फत बन्दसूचीका लागि नाम दर्ता आह्वान गरेको रास्वपाले पर्सामा भने पत्रकार सम्मेलन नै गरेर बन्द सूचीमा समानुपातिक उम्मेदवारको नाम आह्वान गरेर फरक शैली अपनाएको छ ।
क्षेत्र नम्बर २ मा नेपाली कांग्रेसका २ जना अजय चौरसिया र राजेन्द्र बहादुर अमात्य मध्य एकजना उम्मेदवार बन्न सक्ने सम्भावना छ । अजय चौरसिया यसअघि पनि क्षेत्र नम्बर २ बाट निर्वाचित भएका थिए । राजेन्द्र बहादुर अमात्यलाई व्यावस्थापन नगरिए चौरसियालाई यसपटक चुनौती देखिएको छ ।
अमात्यलाई कांग्रेसले वीरगन्ज महानगरपालिकाको प्रमुखमा उम्मेदवार बनाउने गरी पुनःचौरसियालाई नै टिकट दिनसक्ने पनि एकथरीले अनुमान गरेका छन् ।
नेकपा एमालेबाट पर्सा क्षेत्र नम्बर २ मा वीरगन्ज महानगरपालिकाका पूर्व नगर प्रमुख विजय कुमार सरावगी उम्मेदवार बन्ने प्रबल सम्भावना रहेको चर्चा छ । १६ वटा दल मिलेर बनेको सबैभन्दा ठूलो कम्युनिष्ट पार्टी नेपाली कम्युनिष्ट पार्टीको भने क्षेत्र नम्बर १ मा सम्भावित उम्मेदवारको छायाँ तस्वीर अहिले नै बाहिर आएको छैन ।
पार्टी एकतापछि समायोजन लगायतका प्राविधिक कामहरु अझै बाँकी रहेको र जित्न सक्ने उम्मेदवार अहिले नै नदेखिएकोले पनि नेपाली कम्युनिष्ट पार्टीको उम्मेदवारको चर्चा नचलेको हो । पर्साको प्रतिनिधिसभा निर्वाचन क्षेत्र नम्बर ३ मा नेपाली नेकपा एमालेले नयाँ अनुहारलाई उम्मेदवार बनाउने सम्भावना देखिएको छ ।
एमालेले रुपेश पाण्डेलाई पार्टीमा भित्र्याएर प्रतिनिधिसभाको निर्वाचनमा उम्मेदवार बनाउने तयारी गरेको चर्चा चलेको छ । क्षेत्र नम्बर ३ मा पूर्वमन्त्री सुरेन्द्र चौधरी बलियो उम्मेदवारको रुपमा कांग्रेसले पुनः टिकट दिनसक्ने अनुमान गरिएको छ ।
त्यस्तै नेपाली कम्युनिष्ट पार्टीका छोटेलाल प्रसाद यादवले पनि आफू प्रतिनिधिसभा निर्वाचनमा उम्मेदवार बन्न तयार रहेको सामाजिक सञ्जाल मार्फत सार्वजनिक गरेका छन् ।
निर्वाचन क्षेत्र नम्बर ४ मा एमालेबाट जालिम मियाँ उम्मेदवार बन्ने उनी निकटका कार्यकर्ताहरुले सामाजिक सञ्जालमा व्यापक चर्चा चलाएका छन् ।
यद्यपि अहिले एमालेको ११ औं राष्ट्रिय महाधिवेशनका लागि देशभर प्रतिनिधि चयनको प्रकृया चलिरहेको छ । पहिलेको निर्वाचन र यसपटको निर्वाचन निकै फरक भएको छ ।
भदौ २३ र २४ गतेको जेनजी पुस्ताको आन्दोलनले केपी शर्मा ओली नेतृत्वको सरकार ढलेपछि बनेको नागरिक सरकारले गराउन लागेको निर्वाचन भएकोले पनि अबको निर्वाचनमा दलहरुले जेनजी पुस्तालाई बढी प्राथामिकता दिनुपर्ने देखिएको छ ।
यद्यपि जेनजी पुस्तामा निर्वाचन नै जित्नसक्ने हैसियत र वातावरण भने अहिले नै बनेको छैन । त्यसैले पनि यो निर्वाचनमा पूरानै अनुहारहरु पनि बढी दोहोरिने देखिएको छ ।
अब जेनजीको माग सम्बोधन गर्नसक्ने र जेनजी पुस्तालाई पनि समेटेर लानसक्नेले अबको निर्वाचनमा राम्रो मत पाउन सक्छ । त्यसका लागि नयाँ दलहरु र पूरानाबाट पनि युवाको नाममा पार्टी गठन गरेर कसरतमा लागेका छन् ।
जेनजी विद्रोहपछि नै जन्मिएका नयाँ दलहरु र पूराना पार्टी छोडेर नयाँ भनिएका दल र तिनका नेताहरुको अवस्था के होला त्यो भविष्यले निर्धारण गर्नेछ । त्यसको लागि तोकिएको समयमा निर्वाचन भने हुनुपर्छ ।
