हेटौँडा । मकवानपुर प्रहरीले बिलबिजक (बीमा) मा उल्लेख गरिएको भन्दा फरक र शङ्कास्पद सामानहरू लोड भएको एउटा ट्रकलाई नियन्त्रणमा लिएको छ। नियन्त्रणमा लिइएको सामानको मूल्य रु छ लाख अठासी हजार बराबर रहेको बताइएको छ।
जिल्ला प्रहरी कार्यालय मकवानपुर मातहत रहेको प्रहरी चौकी रातोमाटेबाट खटिएको प्रहरी टोलीले मंसिर १२ गते बिहीबार बिहान करिब ८ः३० बजेको समयमा उक्त ट्रकलाई नियन्त्रणमा लिएको हो।
वीरगञ्जबाट हेटौँडातर्फ जाँदै गरेको ना. ८ ख. २७१९ नम्बरको ट्रकलाई हेटौँडा उप–महानगरपालिका वडा नं.– १५ स्थित रातोमाटे चेकपोष्ट अगाडिको सडकमा रोकेर चेकजाँच गर्दा बिलबिजकमा उल्लेख भएको विवरणभन्दा फरक सामानहरू फेला परेका थिए।
प्रहरीले ट्रकका चालक, जिल्ला मकवानपुर हेटौँडा उप–महानगरपालिका वडा नं.– ९ बस्ने वर्ष २४ का निशान वि.क.लाई नियन्त्रणमा लिएको छ।
बिलबिजकभन्दा फरक प्रकृतिका सामानहरू लोड गरी राजस्व छली गरेको शङ्का लागेकाले थप अनुसन्धान तथा आवश्यक कारवाहीका लागि ट्रक र चालक निशान वि।क।लाई राजस्व अनुसन्धान कार्यालय पथलैया, बारा पठाइएको मकवानपुर प्रहरीले जानकारी दिएको छ।
