वीरगञ्ज । चालु आर्थिक वर्षको पहिलो चार महिनामा वीरगञ्ज भन्सार नाकाबाट रु ५४ अर्ब १२ करोड मूल्य बराबरको पेट्रोलियम पदार्थ आयात भएको छ। यस आयातबाट सरकारले रु २२ अर्ब ९० करोड राजस्व सङ्कलन गरेको छ।
वीरगञ्ज भन्सार कार्यालयका अनुसार गत आर्थिक वर्षको सोही अवधिको तुलनामा यस वर्ष पेट्रोलियम पदार्थको आयातबाट प्राप्त हुने राजस्वमा उल्लेख्य वृद्धि भएको छ। गत आवको चार महिनामा रु ५१ अर्ब १९ करोड मूल्यको पेट्रोलियम पदार्थ आयात भएकोमा रु २० अर्ब ८९ करोड राजस्व उठेको थियो।
यस वर्षको चार महिनामा पेट्रोलियम पदार्थको आयातबाट प्राप्त राजस्व गत वर्षको तुलनामा ९।६० प्रतिशतले बढेको छ। रकमका आधारमा गत वर्षको तुलनामा यस वर्षको चार महिनामा पेट्रोलियम पदार्थको आयात रु दुई अर्ब ९३ करोडले बढी हो।
मुख्य पेट्रोलियम पदार्थको आयात र राजस्वको अवस्था चालु आर्थिक बर्षको चार महिनामा डिजेल २४ अर्ब ४० करोड मूल्य बराबरको २ लाख ६८ हजार ६७६ किलोलिटर डिजेल आयात हुँदा १० अर्ब ७३ करोड राजस्व सङ्कलन भएको छ। गत वर्ष रु २१ अर्ब ८३ करोडको डिजेल आयात हुँदा रु ९ अर्ब ७८ करोड राजस्व उठेको थियो।
त्यस्तै १४ अर्ब २७ करोड मूल्य बराबरको १ लाख ६६ हजार ६६३ किलोलिटर पेट्रोल आयात हुँदा रु ९ अर्ब ४३ करोड राजस्व सङ्कलन भएको छ। गत वर्ष रु १२ अर्ब ४३ करोडको पेट्रोल आयात हुँदा रु ८ अर्ब ११ करोड राजस्व उठेको थियो।
यसैगरी एलपी नौ अर्ब ७७ करोड मूल्यको ९ करोड ७३ लाख ९६ हजार ४७२ किलोग्राम एलपी ग्यास आयात भएको छ। सोबाट रु एक अर्ब ८३ करोड राजस्व सङ्कलन भएको छ।
गत वर्ष रु ११ अर्ब १० करोड मूल्यको १० करोड ३ लाख ५९ हजार किलोग्राम एलपी ग्यास आयात हुँदा रु दुई अर्ब आठ करोड राजस्व उठेको थियो।
वीरगञ्ज भन्सार कार्यालयका प्रमुख भन्सार प्रशासक विष्णुप्रसाद ज्ञवालीले चालु आर्थिक वर्षको चार महिनामा पेट्रोलियम पदार्थको आयातमा केही वृद्धि भएको जानकारी दिए ।
