काठमाडौ। सरकारले आमनागरिकलाई सामाजिक सुरक्षाको दायरामा ल्याउने उद्देश्यले सुरु गरेको सामाजिक सुरक्षा कोष (Social Security Fund – SSF) मा जम्मा भएको कूल योगदान रकम झण्डै रु एक खर्ब बराबर पुगेको छ।
कोषका अनुसार, हालसम्म कूल योगदान रकम रु ९५ अर्ब ४४ करोड १० लाख ५६ हजार ३ सय ६२ पुगेको छ। यस कोषमा हालसम्म २२ हजार ३ सय ९ रोजगारदाता सूचीकृत भइसकेका छन् भने सूचीकृत योगदानकर्ताहरूको सङ्ख्या २६ लाख ४१ हजार १ सय ८९ बराबर पुगेको छ।
कोषले स्थापना भएदेखि हालसम्म योगदानकर्ताहरूलाई रु १७ अर्ब ६४ करोड ८८ लाख ३४ हजार ६ सय ८४ बराबरको रकम दाबी भुक्तानी गरिसकेको छ।
भुक्तानी गरिएको दाबी रकममा औषधि उपचार, स्वास्थ्य तथा मातृत्व दाबी अन्तर्गत रु दुई अर्ब ५१ करोड २० लाख ९४ हजार ८ सय २२, दुर्घटना तथा अशक्तता दावी अन्तर्गत रु २२ करोड ८६ लाख ५३ हजार ४ सय ७५, आश्रित परिवार सुरक्षा दाबी अन्तर्गत रु २९ करोड सात लाख ७२ हजार १ सय १६ र अवकाश दाबी (वृद्धावस्था सुरक्षा योजना) अन्तर्गत रु १४ अर्ब ६१ करोड ७३ लाख १४ हजार २ सय ७१ बराबरको रकम समावेश छ।
सरकारले पछिल्लो समय वैदेशिक रोजगारीमा जाने श्रमिकहरूलाई समेत कोषमा अनिवार्य रूपमा सहभागी हुनैपर्ने वाध्यकारी व्यवस्था गरेपछि कोषको प्रभावकारिता तथा यसमा हुने योगदान रकमको वृद्धिमा थप सहयोग पुगेको छ।
औपचारिक क्षेत्र बाहेक स्वरोजगार श्रमिक, उद्योग प्रतिष्ठान तथा विभिन्न सङ्घसंस्थाका कार्यरत कामदार तथा श्रमिकहरू पनि कोषमा सहभागी भइ योगदानकर्ता बन्न सक्छन्।
कोषमा नियमित रूपमा योगदान गर्नेहरूले औषधोपचार, पेन्सन, दुर्घटना अशक्तता सुरक्षा योजना, आश्रित परिवार सुरक्षा योजना र वृद्धावस्था सुरक्षा योजनाअन्तर्गतका विभिन्न सुविधाहरू पाउँछन्।
यद्यपि, कोषमा योगदान रकम बढ्दै जाँदा यसको लगानीका लागि अन्य सिर्जनशील स्रोतहरूको खोजी गर्नुपर्ने आवश्यकता बढेर गएको र कोषलाई थप प्रभावकारी बनाउनुपर्ने आवाज पनि उठ्दै आएको छ।
