कोलकता । तेस्रो मुलुकबाट आयात हुने नेपाली मालवस्तुको ढुवानीमा भारतीय रेल सेवाले लगाउने अधिकतम ‘रिस्ट्रिक्सन’ (रोकावट) ले गम्भीर समस्या उत्पन्न गरेको छ।
भारतीय रेलमार्ग हुँदै नेपालको वीरगन्ज भन्सार कार्यालय (ड्राईपोर्ट) सम्म सिधा आउने कार्गोमा पटक–पटक हुने अवरोधका कारण नेपाली आयातकर्ताहरू मर्कामा परेको गुनासो गरेका छन् भने यसले नेपालका उद्योगहरूलाई समेत प्रभावित पारेको छ।
नेपाली आयातकर्ताहरूका अनुसार दशैं–तिहार अघिदेखि नै भारतीय रेल सेवामा रिस्ट्रिक्सन बढेको छ। यस रोकावटको कारणबारे भने आयातकर्ता, कन्टेनर ह्याण्डलिङ कम्पनी, सिपिङ लाइन र कोलकता पोर्ट ९बन्दरगाह० लगायतका सरोकारवाला निकायहरू समेत अनभिज्ञ रहेका छन्।
वीरगन्ज ड्राईपोर्टमा कन्टेनर ह्याण्डलिङ गर्ने प्रिन्स्टिन लजिष्टिक कम्पनीका कोलकता स्थित पूर्वीक्षेत्रका प्रमुख पार्थ चौधरीले भारतीय रेल सेवामा पछिल्लो समय अत्यधिक रिस्ट्रिक्सन लाग्ने गरेको बताएका छन्।
उनले यसको सम्भावित कारणहरू औँल्याउँदै भने, “भारतको बिहारमा भएको निर्वाचनका लागि मतदाताहरूको सुविधाका लागि यात्रुवाहक रेलहरूलाई बढी प्राथमिकता दिनु एउटा कारण हुनसक्छ। अर्कोतर्फ, भदौं र असोजमा भएको वर्षा, बाढी र डुबानले पनि रेल सेवा प्रभावित भएर धेरै रिस्ट्रिक्सन हुने गरेको हुनसक्छ।”
चौधरीका अनुसार नोभेम्बर २६ तारिख (अर्थात मंसिर १० तारिक) सम्म नेपाली कार्गो ढुवानी गर्ने रेलसेवामा रिस्ट्रिक्सन लाग्ने सूचना आएको छ। यदि यो रोकावट लम्बिएमा नेपाली कार्गो ढुवानीमा थप समस्या आउने उनले चिन्ता व्यक्त गरे।
सरोकारवाला निकायहरूका अनुसार रेलवे सेवाको रिस्ट्रिक्सन चार–पाँच दिनदेखि एक हप्तासम्म पनि हुने गरेको छ। समयमा सामान आयात गर्न नपाउँदा नेपालका उद्योगी व्यवसायीहरूमा आफ्ना उद्योगहरू बन्द गर्नुपर्ने चिन्ता बढेको छ।
रेलवे सेवा रिस्ट्रिक्सनको विषयमा चौतर्फी गुनासो बढेपछि सरोकारवाला सबै निकायले आ–आफ्नो तर्फबाट पहल गरिरहेका छन्। कोलकता स्थित नेपाली महावाणिज्य दूतावासले यस विषयमा भारतीय पक्षसँग कुराकानी गरिरहेको महावाणिज्यदूत झक्क प्रसाद आचार्यले बताए।
त्यस्तै, कोलकता स्थित नेपाली कार्गो ह्याण्डलिङ गर्ने संगठन नेपाल कार्गो ह्याण्डलिङ एजेण्ट (नेचा) का पदाधिकारीहरूले पनि भारतीय रेल सेवामा लाग्ने रिस्ट्रिक्सनले नेपाली कार्गोलाई नेपालतर्फ सार्न समस्या भएको बताएका छन्। नेचाका सदस्य प्रदीप कुमार अग्रवालले कार्गो ढुवानीमा मुख्य भूमिका रहेको रेलवे सेवामा लाग्ने रिस्ट्रिक्सनका कारण समस्या उत्पन्न भएको बताएका छन्।
