धनुषा। मधेश प्रदेश सभा सचिवालयले प्रदेश सभाका पाँच जना सदस्यको पद रिक्त भएको जानकारी दिएको छ। नेपालको संविधानको धारा १८० (घ) बमोजिम लगातार १० वटा प्रदेश सभा बैठकमा अनुपस्थित रहेका कारण उनीहरु पद मुक्त भएको प्रदेशसभा सचिवालले सूचना प्रकाशिन गरेर जानकारी गराएको छ ।
प्रदेश सभा सचिवालयले बिहीबार प्रकाशित गरेको सूचनामा उल्लेख भए अनुसार, ती सदस्यहरू सोही मितिदेखि प्रदेश सभा सदस्यबाट पद मुक्त भएको हो र उनीहरुको पद रिक्त भएको छ।
‘यो जानकारी प्रदेश सभा कार्य सञ्चालन नियमावली, २०७५ को नियम १८५ बमोजिम सम्बन्धित सबैको जानकारीका लागि प्रकाशित गरिएको छ ।’ सूचनामा उल्लेख गरिएको छ ।
प्रदेशसभा सचिवालयका सचिव होमनाथ पहाडीले पनि पदमुक्त गरिएको पुष्टि गरे । उनले भने, ‘प्रदेशसभा सचिवालयले पाँचजना माननीयहरुको पदमुक्त हुने सूचना प्रकाशित गर्ने कुरा भईरहेको थियो । सूचना टाँस्ने तयारी भईरहेको थियो । म खाना खान निवासतिर आए । सूचना प्रकाशित भयो होला ।’
पद रिक्त भएका सदस्यहरु उर्मिला देवी सिंह, सर्लाही, मनिष कुमार सुमन सप्तरी, संजय कुमार यादव सर्लाही, सिंहासन सा कलवार पर्सा, सारदा संकर प्रसाद कलवार बारा रहेका छन् ।
सिंह नागरिक उन्मुक्ति पार्टीबाट प्रदेशसभामा समानुपातिक सांसद थिईन् । सुमन, यादव, र कलवार द्वय जसपा नेपालका प्रदेश सांसदहरु हुन् ।
प्रदेशसभामा पद रिक्तताले मधेश प्रदेशको राजनीति थप जटिल बन्दै गएको छ ।
