हेटौँडा। जिल्ला प्रहरी कार्यालय मकवानपुरले ठूलो परिमाणमा प्रतिबन्धित लागुऔषध ट्रामाडोल क्याप्सुलसहित ५ जनालाई पक्राउ गरेको छ।
प्रहरीले मिति कार्तिक २७ गते बिहीबार बिहान करिब १० बजेको समयमा हेटौँडा उप–महानगरपालिका वडा नं। ५ स्थित सानोपोखरा क्षेत्रमा लागुऔषधको कारोबार भइरहेको भन्ने विशेष सूचनाको आधारमा छापा मार्दा उनीहरूलाई नियन्त्रणमा लिएको हो।
पक्राउ पर्नेमा मकवानपुरका विभिन्न स्थानका पाँच जना युवाहरू रहेका छन् । जिल्ला प्रहरी कार्यालय मकवानपुरका अनुसार बकैया गाउँपालिका–१२ घर भई हेटौँडा–१५ बस्ने १९ वर्षका अशोक स्याङ्तान हेटौँडा–१७ बस्ने बर्ष २० का प्रवेश बरैली, हेटौँडा–४ बस्ने बर्ष २० का निशान कोइराला, हेटौँडा–१७ बस्ने ३५ वर्षका बक्सर भन्ने राजिब लामा र मकवानपुरगढी गाउँपालिका–२ बस्ने २३ वर्षीय दिपेश संजेल रहेका छन् ।
प्रहरीले खानतलासीको क्रममा अभियुक्तहरूले बिक्री वितरणको लागि खाली जग्गामा लुकाई–छिपाई राखेको अवस्थामा ८ हजार तीनसय पिस प्रतिबन्धित लागूऔषध ट्रामाडोल क्याप्सुल बरामद गरेको छ।
लागुऔषधसहित उनीहरूको साथबाट ना.३२ प ३२४४ र बा. प्रदेश ००५ प १८५ नम्बरका दुई थान मोटरसाइकल र मोबाईल समेत बरामद गरिएको जिल्ला प्रहरी कार्यालय मकवानपुरले जनाएको छ।
पक्राउ परेका पाँचै जनालाई नियन्त्रणमा लिई थप अनुसन्धानको लागि सम्मानित मकवानपुर जिल्ला अदालत हेटौँडाबाट लागुऔषध कसुर मुद्दामा ५ दिनको म्याद लिइएको र घटनाबारे थप अनुसन्धान कार्य भइरहेको प्रहरीले जानकारी दिएको छ।
