वीरगंज । वीरगंज उद्योग वाणिज्य संघका पदाधिकारी र कार्यसमितिको एक टोलीले बाराको सिमरामा अवस्थित विशेष आर्थिक क्षेत्र (सेज) को सोमबार स्थलगत अध्ययन अवलोकन गरेको छ।
संघका अध्यक्ष हरि गौतमको नेतृत्वमा गएको टोलीले सेजको भौतिक संरचना, संचालन अवस्था र औद्योगिक पूर्वाधारको विस्तृत अवलोकन गरेको हो।
अवलोकनका क्रममा सिमरा विशेष आर्थिक क्षेत्रका कार्यालय प्रमुख तथा प्राविधिक अधिकारीहरूले टोलीलाई सेजको स्थापना उद्देश्य, वर्तमान प्रगति, औद्योगिक प्लट वितरण, उद्योग दर्ता प्रक्रिया र निजी क्षेत्रका लागि उपलब्ध सहुलियतबारे जानकारी गराएका थिए।
टोलीले सेजमा भइरहेको निर्माण कार्य, बाटो, विद्युत् आपूर्ति, ढुवानी प्रणाली तथा लगानीकर्तालाई आवश्यक पर्ने अन्य पूर्वाधारको अवस्थाको पनि प्रत्यक्ष अध्ययन गरेको थियो।
वीउवासंघका अध्यक्ष हरि गौतमले सिमरा विशेष आर्थिक क्षेत्र देशको औद्योगिकीकरण र रोजगारी सृजनाका लागि रणनीतिक महत्वको परियोजना रहेको बताए । यद्यपि, उनले सेजको प्रभावकारी संचालनका लागि पूर्वाधार विकास, कानुनी स्पष्टता र लगानी सहज वातावरण अझै आवश्यक रहेको औंल्याए ।
संघका वरिष्ठ उपाध्यक्ष माधव राजपालले सिमरा सेजमा देखिएका चुनौती र सुधारका सम्भावनाहरू सम्बन्धित मन्त्रालय र सेज प्राधिकरणसँग छलफल गरी समाधानका लागि पहल गर्ने प्रतिबद्धता व्यक्त गरे ।
अवलोकन टोलीले सेज क्षेत्रमा स्थापनाको तयारीमा रहेका केही उद्योग प्रतिनिधिहरूसँग पनि भेट गरेको थियो, जसले विद्युत् आपूर्ति, कच्चा पदार्थ ढुवानी, कर सुविधा र प्रशासनिक प्रक्रिया सम्बन्धी केही चुनौतीहरू औंल्याएका थिए।
संघका पदाधिकारीहरूले सेजको दिगो संचालनका लागि निजी क्षेत्र, संघीय र प्रदेश सरकारबीचको प्रभावकारी सहकार्य अपरिहार्य रहेकोमा जोड दिएका छन्।
अवलोकन टोलीमा अध्यक्ष गौतम, वरिष्ठ उपाध्यक्ष राजपालसँगै उपाध्यक्ष आषिश लाठ, महासचिव शिवजी प्रसाद साह, कोषाध्यक्ष अनोज रुंगटा, सहसचिव प्रेमचन्द्र गोयल, सहकोषाध्यक्ष निरज अग्रवाल, सहसचिव अनुप अग्रवाल, कार्यसमिति सदस्य मुरली जलान, प्रकाश खण्डेलवाल, सुमन क्याल तथा पत्रकार प्रणय कुमारको उपस्थिति रहेको थियो।
